Чĕмпĕрте – «Акатуй»
Иртнĕ канмалли кунсенче 5 регионти 30 ытла пултарулăх коллективĕ Чĕмпĕре пуçтарăннă. Унта облаçри 31-мĕш Акатуй иртнĕ.
Уява килнисен умĕнче сумлă хăнасем сăмах каланă, çав шутра — Чăваш Республикин культура, наци тата архив ĕçĕсен министрĕ Светлана Каликова та. Вăл Ульяновск облаçĕн ертӳлĕхне чăваш халăхне аталанма, культурине упраса хăварма май туса панăшăн тав тунă, Чăваш Республикин 100-çуллăхне халалланă кĕнеке парнеленĕ.
Сăмах май, облаçри чăваш наципе культурин автономийĕн хастарĕсем вырăнта тĕрлĕ проектсем пурнăçлаççĕ. Чукун çул районĕнчи 47-мĕш шкулта Иван Яковлев бюстне вырнаçтарасшăн. Çĕнĕ чăваш çырулăхĕ йĕркеленнĕренпе 150 çул çитнĕ май Ульяновск хулинче чăваш алфавитне халалласа палăк лартасшăн.