Чӑваш Республикин Пуҫлӑхӗ Олег Николаев  Skyeng онлайн-шкул пуҫаруҫипе, республикӑра ҫуралса ӳснӗ Георгий  Соловьевпа  уҫă калаҫу ирттернĕ.  Вĕсем шкул ачисемшӗн ҫӗнӗ вӗренӳ проектне пурнӑҫламалли майсене сӳтсе явнă.

Георгий Соловьев хӑйӗн тӑван ҫӗршывӗнче проекта пурнӑҫлама 3 №-лĕ лицейра ĕҫленĕ физика учителӗ   Валерий Викторович Горбенко ыйтни хавхалантарнине пĕлтернĕ. Палăртатпăр, вĕрентекен пурнăҫран уйрăлса кайнă.  "Валерий Викторович мана нумай вӗрентрӗ. Ӑна пула эпир Пӗтӗм Раҫҫейри физикӑпа олимпиадӑра ҫӗнтертӗмӗр. Вилес умӗн вӑл ман пата шӑнкӑравларӗ те мана кунта физикӑна вӗрентмелле терӗ. Килсе пулӑшма ыйтрӗ. Ҫапла вара эпӗ 3 № - лӗ лицей базинче (Шупашкар хули) ачасемпе преподавательсем валли курс йӗркелеме шут тытрӑм. Хам пĕтĕмпех тӳлетӗп. Регионта лайӑх шкул пултӑр", – каласа панă предприниматель.

Вӑл каланӑ тӑрӑх, Skyeng, 2019 ҫултанпах  пӗтӗмӗшле пӗлӳпе тивĕҫтерекен дисциплинӑсене вӗрентекен  онлайн-школа Skysmart  тĕллевсене ӑнӑҫлӑ пурнӑҫланать. "Пирӗн мĕнпур вӗренекенсенчен аслисем 60 процент, шкул ачисем 40 процент, шкул ачисен шучӗ тӑтӑшах ӳсет", – палӑртнă Георгий Соловьев. 2021 ҫулхи пуш уйӑхӗнчен пуҫласа шкулта физикӑна вӗрентме пуҫланӑ.

Чӑваш Республикин Пуҫлӑхӗ Олег Николаев Шупашкар лицейӗнче шкула пуҫарса ярас шухăша ырланă.  Вӑл шкул ачисен, наукӑпа вӗренӳ тата бизнес интеграцийӗсен аталантарас енӗпе республика Правительствин планӗсемпе йӗркеленине палӑртнă. "Тӑван лицейра курс йӗркелеме шут тытни питӗ лайӑх. Эпир ҫак ӗҫе пӑхса тухӑпӑр. Килӗшетӗр пулсан, анлӑлатӑпӑр ку ӗҫе», – тенĕ Олег Николаев.  «Эпир ӑна пысăк дистанци технологийӗсемпе усӑ курса глобаллӑ процесса куҫарма хатӗр, ун патне ытти шкулсем, ҫав шутра ялти шкулсем те, кӗме пултараҫҫӗ", – каланă вăл сăмаха ҫавăрса.

Чӑваш Ен Пуҫлӑхӗ республикӑра ачасене маларахри тапхăртах профориентацилес ӗҫ пуҫланнине асăннă. "Пултаруллӑ ачасене тупса палӑртасси  тĕп тĕллевсенчен пĕри. Шалти кӑмӑл-туйӑма, ачасене мӗн кирлине тупса палӑртмалла, унтан аталантармалла. Кунта " пĕтĕмĕшле вăтам пĕлӳ паракан шкул –  аслă шкул – бизнес" пĕр-пĕринпе килĕшсе ĕҫлеҫҫĕ. Комплекслӑ майпа усӑ курни яланах пысӑк кӑтартусем парать, ҫавна пула эпир паха технологиллӗ ҫул-йӗрсене аталантарӑпӑр", – палăртнă республика Пуҫлăхĕ.

Регион Пуҫлӑхӗ Чӑваш Енре it-кластер хастарлӑн аталаннине, республика Правительстви бизнес-пӗрлӗх представителӗсемпе пӗрле креативлӑ экономика енӗпе пӗрлехи проектсене, "ҫав шутра – малашлӑх" проекта пурнӑҫлама та уҫҫӑн ҫыхӑннине каланă.