Ĕç условийĕсемпе сыхлавĕ çинчен калакан патшалăх доклачĕпе ĕçлев министрĕ Алена Елизарова Министрсен Кабинечĕн юнкун ЧР Пуçлăхĕ Олег Николаев ертсе пынипе иртнĕ ларăвĕнче паллаштарчĕ.

2020 çулхи лару-тăрăва хаклакан документра ырă туртăмсене те, япăххисене те тĕплĕ тишкернĕ. Министр çынсем ĕçре суранланасси юлашки çулсенче чакса пынине палăртрĕ — тăхăр çулта 2,4 хут сахалланнă. Çапах пĕлтĕр 144 çын аманнă. Паллах, çак шутра арçынсем нумайрах — 101 çын суранлăннă. Вĕсенчен 12-шĕ — вилмеллех. Инкексем ытларах тирпейлекен производствăсенче, вăрман, сунар, ял хуçалăхĕсенче, строительствăра пулнă. Сăлтавĕсем — ĕçе кирлĕ пек йĕркелеменни, çул-йĕр правилисене, хăрушсăрлăх требованийĕсене уяманни, ĕçлекенсен дисциплини хавшакки.