Паян Чăваш Ен Пуҫлăхĕ Олег Николаев Чăваш Республикин Патшалăх Канашне тухнă Ҫырура 2021 çула эпир чӑваш чӗлхине сыхласа хӑварас тата аталантарас енӗпе йышӑннӑ уçӑмлӑ программӑпа кӗнине, унӑн тӗллевӗ – чӑваш чӗлхин сумне çӗклесси, общество пурнӑçӗнче унпа хастарлӑн усӑ курма майсем туса парассине каланă. Чӑваш Ен Вӗренӳ министерствин чӑваш чӗлхипе тата литературипе çӗнӗ, хальхи вӑхӑтри учебник туса ха­тӗрлемеллине, ӑна республикӑри мӗнпур вӗренӳ учрежденине тата библиотекӑна çитермеллине асăннă.

Иртнӗ çулхи чӳк уйӑхӗн 26-мӗшӗнче эпир Чӑваш тӗррин кунне пуçласа савӑнӑçлӑн уявларӑмӑр. Чӑваш Ен Культура тата Экономика аталанӑвӗн министерствисен умӗнче çакӑн пек тӗллев тӑрать: 2021 çулта чӑваш тӗррине республика бренчӗ пек сарас тата наци тӗррин шкулне чӗртсе тӑратас енӗпе ӗҫлемелле.