Республика кунĕ умĕн йăлана кĕнĕ тăрăх, кашни ҫулах республика Пуҫлăхĕ Олег Николаев  хисепе тивĕҫнисене Раҫҫей Федерацийĕн тата Чăваш Республикин патшалăх наградисене парса чыслать.

Паян хисеплĕ наградăсене пĕтĕмпе 23 ҫын тивĕҫлĕ пулнă. Кунсăр пуҫне тата тепĕр саккăрăшĕ Чăваш Республикин патшалăх премийĕн лауреачĕсен ятне илнĕ.

«Республика кунне паллă тунă май, эпир хамăрăн йăла-йĕркесене тарăнрах ăша хывса пурăнма вĕренсе пыратпăр. Чăваш Енре пурăнаканăн кашни ҫитĕнĕвĕпе эпир мăнаҫланатпăр. Пирĕн тăрăхра пурăнакансем кулленех ырă ĕҫсем туса, ҫитĕнӳсем патне ăнтăлассишĕн ырми-канми тăрăшаҫҫĕ. Кирек-епле йывăрлăха та вĕсем туххăмрах парăнтарма пĕлеҫҫĕ, нимĕнрен те хăрамаҫҫĕ. Ҫĕршыв Президенчĕ палăртнă тĕллевсене пурнăҫа кĕртсе пырассишĕн яваплăха туйса, тӳрĕ кăмăлпа таса чунпа кулленех ĕҫлеме пикенеҫҫĕ. Паянхи пурнăҫ таппинче тухса тăракан ыйтусене уҫăмлатса пырассинче те эсир ыттисемшĕн тĕслĕхре. Сирĕн паха ĕҫĕсене ыттисем тĕпе хурса хăйсен ĕҫĕсене йĕркелесе пыма тăрăшаҫҫĕ.    Палăртма кăмăллă, сире пула, эсир лайăх та пысăк кăтартусем патне ăнтăлнипе Чăваш Енĕн социаллă пурнăҫĕпе экономики пĕр тикĕс лайăх аталанса пырать», – тенĕ Чăваш Ен Пуҫлăхĕ Олег Николаев.

Регион Ертӳҫи хăйĕн сăмахĕнче паян пысăк хисепе тивĕҫнисем хăйсен ĕҫчешĕсем хушшинче яланах пысăк ĕҫ опычĕпе палăрса тăнине, вĕсемпе пурте мăнаҫланнине асăннă.  «Сире палăртса патшалăх наградисемпе чыслани, сирĕн ушкăншăн та чыс та мухтав.  Эсир пĕрне-пĕри пулăшса, пĕр-пĕринпе туслă ушкăнра ĕҫлеме пĕлетĕр. Пĕрлĕхре вăй, тата пысăк ҫитĕнӳсем. Паянхи наградăсем сирĕн пултарулăхăрсене ҫирĕплетсе параҫҫĕ», –  тесе сăмаха ҫавăрса каланă Чăваш Ен Пуҫлăхĕ.

Ҫемье пурнӑҫӗ пире ансат, анчах та питӗ пӗлтерӗшлӗ ӑнлавсене – пӗр-пӗрне юратса хисеплемеллине, аслисемшӗн тӑрӑшмаллине, кӗҫӗннисене пулӑшмаллине – ӑса хывма вӗрентет. Ҫемье – кашни ҫын пурнӑҫӗнчи ҫирӗпрен те ҫирӗп тӗрек. Пурнӑҫра мӗнле-тӗр пӑтӑрмах сиксе тухсан ҫывӑх ҫынсемпе тӑван-хурӑнташ хамӑра ӑнланасса тата пулӑшасса пиртен кашниех ҫирӗппӗн шанса тӑрать. Ҫирӗп ҫемье – сывлӑхлӑ обществӑпа вӑйлӑ патшалӑх никӗсӗ. 

«Ашшĕ-амăшĕн мухтавĕ» ордена Йĕпреҫ районĕнче пурăнакан Александровсен ҫемйи тивĕҫлĕ пулнă.  «Ашшĕ-амăшĕн мухтавĕ»  орден медале Вăрмар районĕнче пурăнакан Порфирьевсен ҫемйине парса чысланă. «Сирĕн ҫемйесем хăйне евĕрлĕ паха тĕслĕх пулса тăраҫҫĕ ыттисемшĕн. Эсир пурнăҫа юратса пурăнни куҫ кĕретех. Ҫитĕнекен ăрăва эсир тĕрĕс воспитани пама пулăшатăр. Ҫемье йăла-йĕркисене тĕпе хурса, хăвăрăн тĕпренчĕкĕрсене ура ҫине тăрататăр. Пĕрне-пĕри пулăшса, хисеплесе килĕштерсе пурăнни вара темрен те паха», –  тесе сăмаха ҫавăрнă Чăваш Республикин Пуҫлăхĕ Олег Николаев.  

Наградăна тивĕҫнисем республика Правительствине хăйсем патне ҫакăн пек пысăк тимлĕх уйăрнăшăн тав тунă, вĕсене награда малашне тата та тухăҫлăрах ĕҫлеме хавхалантарса тăнине асăннă.

Шупашкарти «Зеленстрой» АО директорне Олег Скворцова Чăваш Республики умĕнчи тава тивĕҫлĕ ĕҫсемшĕн  медаль орденпа чысланă.  «Ку наградăна эпĕ пĕччен мар, манăн  мĕнпур ушкăн тивĕҫлĕ пулчĕ», - тенĕ вăл хăйĕн сăмахĕнче. Малашне те пысăк ҫитĕнӳсемпе палăртма, кулленех республика пуласлăхĕшĕн вăй хурса ĕҫлеме шантарнă.  

Чăваш Республикин тава тивĕҫлĕ учителĕ ята Ҫĕнĕ Шупашкар хулинчи 2-мĕш №-лĕ пĕтĕмĕшле вăтам пĕлӳ паракан шкулта ĕҫлекен Оксана Ильина тивĕҫнĕ. «Пĕрлĕхре – пирĕн вăй, ӳлĕмрен те тăрăшса ĕҫлеме хатĕр. Чăваш Республики малашне те пысăк ҫитĕнӳсемпе палăртса тăтăр тесе хамăртан мĕн килнине пурнăҫласа пыма пикенĕпĕр», –  сăмаха ҫавăрса каланă наградăна тивĕҫлĕ пулнă профессионал.