Раштавăн 13-мĕшĕнче пирĕн республикăра ĕçлĕ çӳревпе РФ Президенчĕ çумĕнчи Ача правине хӳтĕлес енĕпе ĕçлекен уполномоченнăй Павел Астахов пулнă. РФ Федераци Пухăвĕн федераци канашĕн ача-пăча тăнăçлăхĕ енĕпе ĕçлекен çум комиссийĕ 2010 çулхи кăтартусем тăрăх хатĕрленĕ «Раççейре тата регионсенче тăлăхсен ыйтăвне татса парассин шайĕ тата регионсен рейтингĕ» аналитика докладĕнче Чăваш Республикине чи лайăх вунă субъект шутне кĕртнĕ. Чăн та, тăлăхсемпе сусăрсене тата ашшĕ-амăшĕн хӳттисĕр юлнисене çемьесене вырнаçтарас енĕпе пирĕн тăрăхра тĕллевлĕ ĕçлеççĕ. Асăннă ушкăна кĕрекенсен 67% хальхи вăхăтра опекăпа попечительсен хÿтлĕхĕнче, вĕсен 17% çĕнĕ çемьесенче тăван кил ăшшине тупнă, 19% усрава илнĕ. Тăлăхсен çуртĕнче тата интернат шкулсенче пурăнакансен йышĕ чакса пырать /танлаштарма: 2008 çулта - 759, кăçал - 605 ача/. Йышăнакан ашшĕ-амăшне суйласа илмешкĕн тата вĕсене пулăшмашкăн 2 центр йĕркеленĕ. Çывăх çыннисен хӳтлĕхĕсĕр юлнисене хваттерпе тивĕçтерме республика тата федераци бюджечĕсенчен укçа сахал мар уйăраççĕ. Интернатран вĕренсе тухнисене пурнăçа хăнăхтармашкăн, социализацилемешкĕн ятарлă служба пур. Сывлăх тĕлĕшĕнчен хевтесĕр тата сусăр ачасене дистанци мелĕпе пĕлÿ парасси аталанать. Çак мелпе халĕ 150-ăн ытла усă кураççĕ. Ачасен прависемпе интересĕсене хӳтĕлес тытăмра, куратпăр ĕнтĕ, курăмлă, витĕмлĕ улшăну сахал мар. Раштавăн 9-13-мĕшĕсенче «ятарлă спецназ» - РФ Президенчĕ çумĕнчи Ача правине хӳтĕлес енĕпе ĕçлекен уполномоченнăйăн тĕрĕслев ушкăнĕ республикăри вĕренӳпе социаллă учрежденисенче пулса çул çитмен тăлăхсемпе сусăрсен пурнăç условийĕсемпе интересленнĕ. Хăйсен пĕтĕмлетĕвĕсене вĕсем Павел Астахова пĕлтерсе тăнă. Омбудсмен хăй те, авă, Чăваш хутлăхне пĕр кунлăх çӳревпе килсе çитнĕ. Чи малтанах вăл Шупашкарти коррекцин пуçламăш шкулĕнче - ача садĕнче пулса унти ĕçсемпе паллашнă, ачасемпе хутшăннă. Нерв тытăмĕ психика тĕлĕшĕнчен улшăннă ачасен ятарлă «Малютка» çуртĕнче, хевтесĕрсен реабилитаци центрĕнче, психиатри больницинче пулса вĕсенчи ĕç-пуçа хакланă хыççăн Павел Астахов Правительство çуртĕнче ЧР Президенчĕпе Михаил Игнатьевпа тĕл пулчĕ, вĕсем ачасен ирĕкне хӳтĕлес ыйтусене сӳтсе явнă, ку енĕпе килĕшӳ çирĕплетсе алă пуснă. Павел Астахов палăртнă тăрăх - республикăра ачалăх ыйтăвĕсене татса панипе кăмăллă вăл. Ку енĕпе ырă программа сахал мар. «Ача-пăча спецназĕн» тĕрĕслевçисемпе тĕл пулнă, федераци ведомствисен, право йĕркине сыхлакан органсен, влаçăн ĕç тăвакан органĕсен, общество организацийĕсен ертӳçисемпе курав мелĕпе конференци ирттернĕ хыççăн Павел Астахов массăллă информаци хатĕрĕсен журналисчĕсене пресс-конференцие пухнă.