Çак кунсенче rреспублика Президенчĕ Михаил Игнатьев тĕрлĕ тытăмра нумай çул тÿрĕ кăмăлпа ĕçлесе пысăк çитĕнÿ тунисене патшалăх наградисемпе чысланă. «Эсир Чăваш Енĕн мухтавĕ, вăйĕ. Республика ĕçчен халăхпа пуян, ку - чи кирли, чи пĕлтерĕшли», - терĕ Президент пухăннисене саламланă май. Республика пуçлăхĕ 2011 çулхи ĕç-хĕле пĕтĕмлетнĕ май социаллă тытăмри тата экономикăри пысăк çитĕнÿ граждансем ырми-канми ĕçленĕрен пулнине палăртнă. Сумлă наградăсене тивĕçнĕ йышра тĕрлĕ професси çынни: электрик, тухтăр, ял хуçалăх ĕçченĕ, предприяти-организаци ертÿçи... Акă Евгений Малайкин водолаз «Чăваш Республикин тава тивĕçлĕ çăлавçи» пулса тăчĕ. Ку таранччен вăл 170 çынна вилĕмрен çăлнă, 156-шне шыв айĕнчен кăларнă. «Чăваш Республикин вĕрентĕвĕн тава тивĕçлĕ ĕçченĕ» ята Çĕмĕрлери 3-мĕш шкул директорĕн çумĕ Елена Голованова тивĕçнĕ. «Манăн çитĕнÿре ĕçтешĕмсен тÿпи те пур. Куллен вун-вун ача куçĕнчен тинкеретпĕр. Вĕсем тĕкĕр пек: республика вĕрентĕве аталантарма мĕн таран вăй хунине аван кăтартаççĕ, - тенĕ Президента тава тивĕçнĕ вĕрентекен. - Манăн шухăшăмпа, ачалăх - кĕтме пултарайман тапхăр. Тавах сире ача-пăчашăн тăрăшнăшăн». Михаил Игнатьев пурне те çывхарса килекен Çĕнĕ çул уявĕсемпе саламланă, ăнăçу суннă.