Михаил Игнатьев Президент ячĕпе Чăваш Ен çыннисене Республика кунĕ ячĕпе тата Шупашкарти экономика форумне хутшăнакансене саламлакан телеграммăсемпе çырусем йышлă килеççĕ. Калăпăр, Григорий Рапота полпред экономика форумĕн хăнисене ĕçлĕ çыхăнусем йĕркелеме сунса çапла палăртнă: «Кăçалхи форумăн тĕп тĕллевĕ - регионсен инвестици илĕртÿлĕхне ÿстерессипе инфратытăм проекчĕсене пурнăçлас тĕлĕшпе патшалăх политикине тытса пырассипе, нанотехнологисене аталантарассипе çыхăннă ыйтусене сÿтсе явасси. Çакă Раççей регионĕсенче инновацисене тĕпе хуракан экономика тытăмне çирĕплетме май парĕ».

«Илĕртÿллĕ çак çĕр-шыв çыннисене чунтан саламлатăп. Украинăпа Чăваш Ене авалхи туслăх çыхăнтарать. Çывăх вăхăтра сирĕн республикăна пырса курасса, ĕçтешлĕх майĕсене сÿтсе явасса шанатăп», - тенĕ хăйĕн çырăвĕнче Украинăн Раççейри посолĕ Владимир Ельченко.

Экономика форумне хутшăнакансене çавăн пекех Федераци Канашĕн Председателĕн пĕрремĕш çумĕ Александр Торшин саламланă: «Чăваш Ен - Атăл тăрăхĕн илемлĕ çĕрĕ. Унта паянхи аталанупа аваллăх йăли-йĕрки пĕрлешнĕ». Беларуçăн Раççейри посольствин Хусанти уйрăмĕн ертÿçи Руслан Дрозд та республикăна ырă суннă: «Сирĕн регион Беларуçшăн экономика, наука, культура çыхăнăвĕсене аталантарас енĕпе илĕртÿллĕ. Чăваш Ен ертÿçисем çĕнĕ технологисемпе инвестицисене çул пама ăнтăлнине палăртас килет. Сирĕн çитĕнÿсем - Чăваш Енĕн ĕçчен халăхĕ вăй хунин кăтартăвĕ».

Патшалăх Думин Сывлăх сыхлавĕн комитечĕн председателĕ Ольга Борзова Чăваш Ене «социаллă пурнăçпа экономикăна кал-кал аталантарма тата чечекленÿ» суннă. (К.Семенов автор)