Чăваш Ен Президенчĕ Михаил Игнатьев утă уйăхĕн 7-мĕшĕнче пĕчĕк тата вăтам бизнесра вăй хуракансемпе тĕл пулчĕ.

- Предприниматель ĕç-хĕлĕнчи çивĕч ыйтусене уççăн пĕлтерме ыйтатăп, - терĕ республика пуçлăхĕ канашлăва уçса. - Вĕсене пĕрле сÿтсе явса аталану çулне тупар. Влаçпа бизнесăн пĕр-пĕринпе лайăхрах хутшăнмалла. Пĕр енчен, мал ĕмĕтлĕ хуçасене çĕнĕ производство пуçарма тата хушма ĕç вырăнĕсем йĕркелеме патшалăх органĕсем пулăшĕç. Тепĕр енчен, республика экономикине аталантарма бизнесменсем те хутшăнĕç.

Харпăр хăй ĕçне пуçласа янисен тÿпи - Чăваш Енре туса илекен мĕн пур продукци калăпăшĕнче 13 процент. Вĕсем 2010 çулта кредит виçĕм çулхинчен 2 хут ытларах илнĕ.

Республикăра - 46 пин уйрăм предприниматель тата «АПК аталанăвĕ» наци проекчĕпе килĕшÿллĕн яла кредит хывнă 54 пин килти хуçалăх. Предпринимательсене тĕкĕ паракан темиçе программа пурнăçланать, вĕсене налук тÿлес тĕлĕшпе çăмăллăх панă. ЧР Патшалăх Канашĕн çак эрнере иртнĕ сессийĕ республикăн кăçалхи бюджетĕнчи тупăшсемпе тăкаксен пайне пысăклатма йышăннă. Ку пĕчĕк тата вăтам бизнеса патшалăх пулăшăвĕ ытларах илме май парĕ.

- Влаçпа бизнеса пĕр-пĕрин шухăшĕпе паллаштарма Чăваш Республикин Общество тата Суту-илÿпе промышленноç палатисем те пур, - терĕ малалла Михаил Игнатьев. - Сире Министрсен Кабинечĕн членĕсем те йышăнĕç.

Чăваш Ен Тутарстанпа, Пушкăртстанпа, ытти регионпа суту-илÿ тухăçлă йĕркелет, республика тулашĕнчи рынокра та хастар. Президент иртнĕ çулхи чÿк уйăхĕнче Женевăран Пĕтĕм тĕнчери суту-илÿ центрĕн наци проекчĕсен пайĕн директорĕ Фридрих фон Кирхбах ĕçлĕ çул çÿревпе килнине аса илчĕ, çывăх вăхăтра центр тĕп хулара чикĕ леш енне тавар сутассипе çыхăннă ыйтупа конференци ирттерессине пĕлтерчĕ.

- Бюджет тытăмĕнче вăй хуракансен ĕç укçине кăçал 30 процент ÿстерме йышăннине эсир пĕлетĕр, - терĕ республика пуçлăхĕ. - Ăна пĕчĕк тата вăтам бизнесра та хăпартсан лайăхчĕ.

Чăваш Республикин экономика аталанăвĕн, промышленноç тата суту-илÿ министрĕн тивĕçĕсене пурнăçлакан Александр Быченков патшалăх предпринимательлĕхе мĕнлерех пулăшни çинчен каларĕ, ăна ура хуракан чăрмавсенчен хăш-пĕри çинче чарăнса тăчĕ. Сăмахран, Çĕнĕ Шупашкарта икĕ предприниматель çĕр пирки пĕр чĕлхе тупаймаççĕ, тирпейлекен предприятисен ял хуçалăх организацийĕсен умĕнчи парăмĕ 50 миллион ытла тенкĕ пухăнса кайнă. Комбинатсем вăхăтра татăлмаççĕ. Президент вĕсен директорĕсене пухма, парăмсене пĕтерме хушрĕ.

Бизнесменсем хăйсене пырса тивекен ыйтусене экономика аталанăвĕн министерствине сайт урлă та пама пултараççĕ. 30 çула çитмен 12 çамрăк предприниматель республика пулăшнипе бизнес-проект пурнăçа кĕртнĕ. Пĕчĕк предпринимательлĕхре çулталăка яхăн тăрмашакансем 45 гранта тивĕçнĕ. Кăçал бизнесменсен йышĕ 8-9 процент хушăнас шанăç пысăк. Иртнĕ çул вĕсене аталантарма 43 миллион тенкĕ уйăрнă, кăçал 65 миллион тенкĕ куçарма пăхнă.

Суту-илÿпе промышленноç палатин ертÿçи Игорь Кустарин патшалăх органĕсенче тар тăкакансем бизнес умне тухса тăракан ыйтусене ăнланса йышăннине, çав вăхăтрах влаçăн вăтам шайĕнчи чиновникĕсем вĕсене татса парас мар тесе тем тума та тăрăшнине пытармарĕ. «Строймаш» обществăн техника директорĕ Владимир Нюренберг каланă тăрăх - кредитсем производствăна çĕнĕ технологисем кĕртме, нумай йывăрлăха пĕтерме май параççĕ. Сăмах илнисем банксен умĕнчи кивçене вăхăтра татман тĕслĕхсене те хускатрĕç.

- Суту-илÿпе промышленноç палатинче бюро йĕркелеме сĕнетĕп, - терĕ «Правăна хÿтĕлекен центр» общество директорĕ Камярия Андриенко. - Унта парăмсене пĕтермен бизнесменсен картотекине уçмалла.

- Шанăç паракан тата тÿрĕ çулпа пыракан предпринимательсене патшалăх яланах пулăшĕ, - пĕтĕмлетрĕ канашлăва республика ертÿçи. - Саккунсене пăсакан, уйрăммăн илсен - налук тÿлемен, ытти преступлени тăвакан бизнесменсен айне «вут хурсах» тăрăпăр.

Бизнес этикипе, культурипе, социаллă яваплăхпа çыхăннă ыйтусене те сÿтсе яврĕ. ("Хыпар")