Чăваш Республикин Президенчĕ Михаил Игнатьев ĕнер çул-йĕр тăвакан, юсакан тата ăна пăхса тăракан предприятисен ертÿçисемпе канашлу ирттерчĕ. Унта хутшăннисем Чăваш Енри автомобиль çулĕсен лару-тăрăвне тата вĕсене нормативсемпе килĕштерес тĕлĕшпе мĕнле ĕçленине тишкерчĕç.

Республика пуçлăхĕ ир кÿлĕм Шупашкарти çулсене юсас ĕç мĕнлерех пынипе паллашрĕ. Уйрăммăн илсен çурçĕр-хĕвел анăç районĕнчи Элкер урамне юсамалли проектпа кăсăкланчĕ. «Ăна пĕр эрнере пурнăçламалла», - хурав пачĕ хула администрацийĕн пуçлăхĕ Алексей Ладыков.( Авторĕ Ю.Михайлов) 

Автомашинăпа Шупашкара Кÿкеç енчен кĕрекенсем Президент бульварне База тăкăрлăкĕпе тухмаллине лайăх пĕлеççĕ. Унта транспорт яланах йышлă, çул хăвăрт ванать. Хула ертÿçисем ăна тĕпрен юсамалла теççĕ. Республикăн килес çулхи бюджетĕнчен укçа уйăрма ыйтаççĕ.

Чăваш Ен ертÿçи Шкул тăкăрлăкне те çитрĕ. Ăна çак кунсенче юсанă. Михаил Васильевич строительсен ĕçне пахаларĕ, рабочисемпе калаçрĕ. Микрорайонта пурăнакансен ыйтăвĕсене хуравларĕ. Пĕрремĕшĕ - пурăнмалли çурта, тепри урамри çула тахçантанпах юсаман пирки Михаил Игнатьевпа тĕл пулма пынă.

Кун йĕркине кĕртнĕ ыйтупа Чăваш Республикин хула тăвас ĕç тата общество инфратытăмĕн министрĕ Александр Гончаров доклад турĕ. «2006 çултанпа республикăра мĕн пур йышши автомобиль йышĕ 175,2 пинрен 201,3 пине çитнĕ, - терĕ вăл. - Пĕлтĕр груз 4 çул каяллахинчен 200% нумайрах турттарнă. Автотранспорт 2006 çулхинчен нумайрах çÿрет. Йывăр автомобиль тата автопуйăс çĕр-çĕр шута илнĕ. Федераци çулĕпе çулла талăкра вăтамран 30 пине яхăн транспорт иртет. Пĕр-пĕрин хыççăн пынине пурте кураççĕ. Пирĕн çулсем автомашина хальхинчен ытларах йышăнаймаççĕ. Трассăсене сармалла, çĕнĕ çулсем тумалла».

Министр республикăн малашлăх тĕллевĕпе паллаштарчĕ. Федерацин 2015 çулчченхи çумпрограммипе килĕшÿллĕн Чăваш Ен урлă иртекен М-7 «Атăл» çула тĕпрен юсамалла тата Сăр çийĕн çĕнĕ кĕпер тумалла. Раççей Правительстви кăçал çав тĕллевпе - 4,7, кĕпер хывма 3,2 млрд тенкĕ уйăрать. Çак çулсене тĕпрен юсама палăртнă: Çĕрпÿ-Ульяновск - 10,8 км* М-7 «Атăл» - 31,3 км* «Вятка» трассăн ГЭС урлă каçакан пайĕ. Çĕрпÿ, Канаш районĕнчи Шăхасан, Вырăскас Пикших, Канаш, Комсомольски, Патăрьел районĕнчи Тăрăн, Патăрьел, Карапай Шăмăршă, Шăмăршă, ытти хăш-пĕр ял чарăнăвне çутă юписем лартма федераци бюджетĕнчен укçа куçараççĕ.

Шел те, укçа-тенкĕ çителĕксĕррипе нумай тĕллев пурнăçланмасть. 2006 çултанпа Етĕрне районĕнчи Никольское-Етĕрне-Калинино çула тĕпрен юсасси малалла пырать. Ăна çитес çулсенче вĕçлеме палăртнă. Пĕлтĕр Комсомольски-Елчĕк-Пăва трасса çинче юсав пуçланнă. Кăнтăрти районсен ĕмĕтне çитерме тата 198 млн тенкĕ кирлĕ. «Шупашкар-Сăр» автоçул хывма проект хатĕрленĕ. Вăл Чăваш Ене Мордва Республикипе, Ульяновск тата Чулхула облаçĕсемпе çыхăнтарма май парĕ.

Хула администрацийĕн пуçлăхĕ Алексей Ладыков Шупашкарта çул-йĕр тăвасси мĕнлерех пынипе паллаштарчĕ. Нумаях пулмасть Калинин урамĕнчи çула тĕпрен çĕнетнĕ, ытти урампа тăкăрлăкра асфальт хураççĕ. Анчах палăртнă тĕллевсене çывăх вăхăтра пурнăçлама Шупашкар хула бюджетĕнче укçа çителĕклĕ пăхса хăварман. Мэр республика бюджетĕнчен «кĕмĕл» уйăрасса шаннине пытармарĕ.

«Кăçал республика çул-йĕрне пурĕ 6,6 млрд тенкĕлĕх инвестици хыватпăр, - пĕтĕмлетрĕ республика ертÿçи. - Федераци хыснинчен 4,7 млрд тенкĕ куçармалла. Республика тата муниципалитет бюджечĕсенчен чылай уйăрмалла. Ĕç иртнĕ çулсенчи пекех пырать. Анчах ăна лайăхрах, пахалăхлăрах тăвассишĕн тăрăшмалла. Эпĕ çул-йĕр тăвакан предприятисен умне çавнашкал тĕллев лартатăп».(авторĕ Ю.Михайлов)