Республикăн тĕп хулинче утă уйăхĕн 21-24-мĕшĕсенче иртекен çăмăл атлетсен Раççей чемпионачĕн тĕллевĕ уçăмлă: умра - Олимп вăййисен çулĕ. Тăван çĕр-шывăн чысне унта хÿтĕлекен команда йышне кам кĕресси Шупашкарта палăрĕ. Турнир пĕлтерĕшне спортсменсемпе вĕсен тренерĕсем кăна мар, çăмăл атлетикăна кăмăллакан пур çын та аван ăнланать. Шупашкарта мала тухнисемпе призерсем кăçал Корейăри тĕнче чемпионатĕнче тупăшĕç, унтан вĕсен çулĕ Олимп вăййисене выртĕ.

Чи вăйлă атлетсен Шупашкарти тĕп ăмăртăвне çĕр-шывăн тĕрлĕ регионĕнчен пине яхăн спортсмен килнĕ. «Олимпийский» стадионра хăйсен пултарулăхне туллин кăтартма пĕтĕм услови туса панă. Çакна чемпионат умĕн йĕркелÿ комитечĕ олимп резервĕсен училищинче ирттернĕ пресс-конференцире республика ертÿлĕхне тав туса каланă сăмахсем аван çирĕплетеççĕ. Журналистсемпе тĕл пулнă чухне Пĕтĕм Раççейри çăмăл атлетика федерацийĕн президенчĕ Валентин Балахничев, ЧР спорт министрĕ Анатолий Николаев, çĕр-шывăн çăмăл атлетсен пĕрлештернĕ командин тĕп тренерĕ Валентин Маслаков, Олимп вăййисен чемпионĕ Андрей Сильнов тата турнирăн тĕп судйи Сергей Котов Чăваш Ен пысăк пĕлтерĕшлĕ ăмăртăва виççĕмĕш хут ирттернине, спортсменсемпе хăнасене пĕтĕм услови туса пама тăрăшнине, тараватлăхне кăмăлтан палăртрĕç. Валентин Васильевичпа Валентин Михайлович ĕнерех Чăваш Республикин Президенчĕпе Михаил Игнатьевпа тĕл пулнă. Вĕсем Михаил Васильевичăн ырă сунăвне çĕр-шыври тата республикăри массăллă информаци хатĕрĕсенче ĕçлекенсем тата пресс-конференцие хутшăннă спортсменсем патне çитерчĕç.

Каларăмăр ĕнтĕ, пысăк чемпионата тĕп хуламăр виççĕмĕш хут йышăнать. Раççейĕн чи вăйлă çăмăл атлечĕсем Шупашкарта 2002 çулта вăй виçнĕ, чылайăшĕ çĕр-шыв, Европа рекорчĕсене çĕнетнĕ. Çĕнтерÿçĕсемпе призерсем Шупашкара паян та ырăпа аса илеççĕ: кунти ăмăртусенче çĕнтерсе çĕр-шывăн пĕрлештернĕ командин йышне кĕнĕ-çке вĕсем. Сăмахран, каярахпа Юрий Борзаковский Олимп чемпионĕн ятне те тивĕçнĕ. Юрий хальхинче те чăвашсен тĕп хулийĕ ăнăçу кÿрессе шанать.( Авторĕ Ю.Степанов)