Раççей Федерацийĕн шалти ĕçсен министрĕн Рашид Нургалиев арми генералĕн ĕçлĕ визичĕн çулĕ Чăваш Ене Чечня тата Дагестан республикисемпе Ставрополь крайĕ урлă выртнă. Рашид Гумарович ĕнер республикăри Шалти ĕçсен министерствин тытăмĕнчи ятарлă тата уйрăм пĕлтерĕшлĕ отрядсен никĕсĕ çинче федерацин Атăлçи округĕнчи çакăн евĕрлĕ отрядсен ертÿçисемпе канашлу ирттернĕ. Унăн ĕçне çавăн пекех Раççей шалти ĕçсен министрĕн пĕрремĕш çумĕ - полици генерал-лейтенанчĕ Александр Горовой, Раççей министерствин ятарлă пĕлтерĕшлĕ подразделенийĕсемпе авиацие çĕнĕ техникăпа тивĕçтерекен управлени пуçлăхĕ - полици генерал-лейтенанчĕ Владимир Горшуков, Чăваш Республикин шалти ĕçсен министрĕ, полици полковникĕ

Сергей Семенов хутшăннă.

Канашлура Рашид Нургалиев ятарлă подразделенисен пĕлтерĕшĕ уйрăмах пысăккине палăртрĕ: «Общество танлăн аталанса пынă май криминал тĕнчи те çав пулăмран юласшăн мар. Тата сĕмсĕртереххĕн хăйĕн вăйне кăтартасшăн... Çакна хирĕç пирĕн тивĕçлĕ хурав памалла, вăя хирĕç тата пысăкрах вăй пуррине туйса тăччăр. Оперативлă тата шырав мероприятийĕсене, следстви ĕçĕсене çÿллĕ шайра ирттернинчен, преступниксемпе право йĕркине пăсакансене çийĕнчех явап тыттарнинчен - обществăра тăнăçлăх мĕнле пуласси нумай килет. Спецназ подразделенийĕсем çак тивĕçе кăна пурнăçлама пултараççĕ. Ку вĕсемшĕн - чыс, хăюлăх тата професси ăсталăхĕ».

Шалти ĕçсен министерствине тĕпрен çĕнетсе улăштарни унăн тытăмĕнчи ятарлă подразделенисене те пысăк витĕм кÿчĕ. Чи малтанах нормăпа право никĕсĕ тĕппипе çĕнелсе урăхланчĕ. Тĕп улшăну - ятарлă пĕлтерĕшлĕ подразделенисене ертсе пырассине централизацилени, е, урăхла каласан, Раççей субъекчĕсенчи темиçе подразделение пĕрлештерни. Хальхи вăхăтра Раççей ШĔМĕн йышăнăвĕпе кун пек 5 центр туса хунă та ĕнтĕ. Ытти отряда пĕрлештересси 2012 çулхи çуркуннеччен вĕçленмелле. Çакăн лайăх енĕ нумай: çĕнĕ техникăпа ытларах тивĕçтерĕç тата ытти те.

Рашид Гумарович федерацин Атăлçи регионĕнчи ятарлă отрядсен, çав шутра - пирĕнне те, ĕç-хĕлне пысăк хак пачĕ. Вĕсем хĕрÿ вырăнсенче пĕр хут çеç мар пулнă, заданисене чыслăн пурнăçланă, хăюлăхпа паттăрлăхшăн çĕр-шыв наградисене тивĕçнĕ. Кăçалхи пĕрремĕш çур çулта çеç округри подразделенисем 5 пин ытла ятарлă операци ирттернĕ, лайăх хĕç-пăшалланнă 29 ушкăна тĕп тунă, 400 ытла тĕрлĕ хĕç-пăшал, тонна çурă сирпĕтекен хатĕрсем туртса илнĕ, 198 взрыв хатĕрне тупса сиенсĕрлетнĕ. Çĕр-шыв Президенчĕн хушăвĕпе федераци бюджетĕнчен уйăракан хушма 1 млрд та 100 млн тенкĕ - ятарлă подразделенисен техникăпа пурлăх никĕсне çирĕплетме хывнă пысăк тĕрев.

Канашлу вăхăтĕнче Рашид Нургалиев ятарлă подразделенисен сотрудникĕсене социаллă хÿтлĕх кÿресси мĕнле пулса пыни тата малашлăхра мĕнле пуласси çинче чарăнса тăчĕ. Мĕншĕн тесен вĕсен ĕçĕн спецификацине тата пурнăçлакан ыйтăвăн йывăрлăхне кура çакăн евĕрлĕ подразделенисенче хĕсметре тăракан офицерсене социаллă гаранти уйрăмах кирлĕ.

Канашлу хыççăн арми генералĕ Рашид Нургалиев Чăваш Республикинчи уйрăм тата ятарлă пĕлтерĕшлĕ подразделенисем приказа пурнăçланă чухне кăтартакан ăсталăхне сăнарĕ. Вĕсен пултарулăхне пысăк хак пачĕ, спецназа тав турĕ. Ун хыççăн Раççей ШĔМĕн министрĕ хĕсметре уйрăмах палăрнисене ведомство наградисемпе чысларĕ. «Хĕсметри паттăрлăхшăн» медале Чăваш Енĕн уйрăм отряд сотрудникĕсем, полици прапорщикĕсем Иван Лапшин, Александр Соловьев, Лев Павлов аслă прапорщик тивĕçнĕ. Ĕнерех СОБР офицерĕсен - Андрей Егоров полици капитанĕпе Игорь Тихонов полици майорĕн - кăкăрĕ çинче «Çарти пĕрлĕхшĕн» медаль çиçме пуçларĕ, ОМОН командирĕн тивĕçĕсене пурнăçлакан милици подполковникĕ Александр Велиуллов «Ятарлă подразделенисенчи тава тивĕçлĕ ĕçсемшĕн» медальлĕ пулчĕ. Наградăсене панă май Рашид Нургалиев министр вĕсене тата ĕçтешĕсене ăшшăн саламларĕ, тивĕçе малашне те чыслăн пурнăçлама ырă сунчĕ.

Ун хыççăн Рашид Нургалиев министр, Чăваш Республикин Президенчĕ Михаил Игнатьев Шалти ĕçсен министерствин ертÿлĕхĕпе тĕл пулчĕç, тĕрлĕ çивĕч ыйтăва татса пачĕç. Видеоконференци евĕр ирттернĕ канашлăва районсенчи шалти ĕçсен пайĕсен ертÿçисем те хутшăнчĕç.  (Ю.Степанов)