Утă уйăхĕн 24-мĕшĕнче ЧР Президенчĕ Михаил Игнатьев Раççей Федерацийĕн спорт, туризм тата çамрăксен политикин министрĕпе Виталий Муткопа тĕл пулу ирттернĕ. Ведомство пуçлăхĕ республикăна ĕçлĕ визитпа килнĕ.

Михаил Игнатьевпа Виталий Мутко Шупашкарта çăмăл атлетика енĕпе иртекен Раççей чемпионатне сÿтсе явнă. Аса илтеретпĕр: ăмăртусем «Олимпийский» стадионта утă уйăхĕн 21-мĕшĕнче уçăлнă, 24-мĕшĕнче унта Корейăри Тегу хулинче çăмăл атлетика енĕпе тĕнче чемпионатне хутшăнма каякан Раççей командин йышне палăртнă.

«Пире, чемпионат йĕркелÿçисене, Шупашкарти стадиона нумай спортсмен телейлĕ тени савăнтарать. Хам сăнарăм: Анна Чичерова çуралнă кунĕнче Раççей рекордне турĕ, 2 метр та 7 сантиметр çÿллĕшне сикрĕ. Куракансем хавхалантарни те ăна пулăшрĕ пулас», - тенĕ Михаил Игнатьев.

Виталий Мутко Чăваш Ен çак мероприятие ирттерме питĕ яваплă хатĕрленнине палăртнă. Хăнана куракансем йышлă пулни тĕлĕнтернĕ. «Эпĕ пĕлнĕ тăрăх Чăваш Енре çăмăл атлетика - спортăн тĕп енĕ. Сирĕн патра физкультура, сывлăха çирĕплетмелли комплекссем тăвас проектсемпе, çăмăл атлетика манежĕпе, çăмăл атлетикăна аталантармалли программăпа паллашнă. Эпир сире тĕрлĕ енĕпе пулăшса пырăпăр», - тенĕ Виталий Мутко. Министр çавăн пекех нумаях пулмасть Федераци субъекчĕсен спорт рейтингне хатĕрлени çинчен пĕлтернĕ. 6 кăтартупа та Чăваш Ен малти вырăнта. «Малашне те çапла ĕçлемелле», - палăртнă спортпа туризм министрĕ.

Тĕл пулу вăхăтĕнче çавăн пекех пысăк квалификациллĕ спортсменсем, Раççей командисен членĕсене хатĕрлес ыйтăва хускатнă.

Михаил Игнатьевпа Виталий Мутко, Пĕтĕм Раççейри çăмăл атлетика федерацийĕн президенчĕ Валентин Балахничев çăмăл атлетика енĕпе Раççей командин членĕсемпе тĕл пулнă.

Калаçу вăхăтĕнче професси спортне аталантарас тата Раççейĕн наци командине пулăшас темăна хускатнă. Виталий Мутко каланă тăрăх «паян спортсменсемпе нумай ыйтăва татса панă: тивĕçлĕ ĕç укçи тÿлеççĕ, спортсменсен пурнăçне страхланă, командировкăсене, санаторипе курортра сипленнĕшĕн тÿлеççĕ. Часах тренерсене те пулăшу кÿрĕç».

Ун хыççăн пресс-конференци пулнă. Виталий Мутко министр чемпионат кăтартăвĕсем тĕпрен илсен япăх мар пулнине пĕлтернĕ, талантлă çамрăк спортсменсем - çĕр-шыв шанăçĕпе спорт пуласлăхĕ - пур.

ЧР Президенчĕ çапла каланă: «Çак кунсенче эпĕ стадионтах пурăнтăм темелле. Сирĕн ăмăртусем, ăсталăхăр, çĕнтерÿсем патне ăнтăлни хавхалану кÿреççĕ. Раççейĕн иртнĕ чемпионачĕн кăтартăвĕсемпе йĕркеленĕ команда тĕнче чемпионатĕнче пысăк çитĕнÿсем тăвасса шанатăп».

Пĕтĕм Раççейри çăмăл атлетика федерацийĕн президенчĕ Валентин Балахничев республика ертÿçисене ăшшăн йышăннăшăн, ăмăртусене лайăх йĕркеленĕшĕн тав тунă.

Олимп чемпионки, сăнă ывăтас енĕпе ылтăн медаль çĕнсе илнĕ Мария Абакумова çакна палăртнă: «Умра - тĕнче чемпионатĕнчи йывăр кĕрешÿ. Республика ертÿçисене пысăк тав. Кунта ăмăртма кăмăллă пулчĕ. Чăваш Енре спорта юратакан, ырă кăмăллă çынсем пурăнаççĕ».

ЧР Президенчĕ тата сумлă хăнасем Çĕнĕ Шупашкарта лаша спорчĕ енĕпе ачасемпе çамрăксен спорт шкулĕнче пулнă. Занятисем ирттерме кунта условисем питĕ лайăх. Ачасем шкула тÿлевсĕрех çÿреççĕ. Валерий Краснов директор шкул ăнăçăвĕсем, аталану малашлăхĕ çинче чарăнса тăнă.

Министр пыл сăри тутанса пăхнă, «Тавтапуç!» - тенĕ. Халăх ăстисем хăнана хăйсем тунă йывăç кашăк парнеленĕ. Виталий Мутко пыла çак кашăкпа çеç çиме шантарнă.

Михаил Игнатьевпа Виталий Мутко «Труд» стадионта çĕнĕ футбол площадки уçнă. Республикăн спорт пурнăçĕнчи пысăк пĕлтерĕшлĕ пулăм Шупашкарта пурăнакансене, тĕп хула хăнисене тата 100-е яхăн çамрăк футболиста пухнă.

ЧР Спорт министерствин ачасемпе çамрăксен спорт шкулĕн футбол стадион-площадкине çулталăк тунă. Ун валли 27 млн тенкĕ ытла укçапа усă курнă. Малашне кунта физкультурăпа спортăн ку чухнехи комплексне тума палăртаççĕ.

Михаил Игнатьевпа Виталий Мутко çамрăк футболистсемпе калаçнă, вĕсемпе футболла вылянă. «Труд» стадионти çĕнĕ площадкăна уçнă кунах пĕрремĕш ăмăрту иртнĕ. Вырсарни кун кунта Чăваш Енри ачасен сывлăха çирĕплетмелли лагерĕсен йăлана кĕнĕ спартакиади иртнĕ. 13 команда çĕнтерессишĕн кĕрешнĕ.

ЧР Президенчĕ Михаил Игнатьев, РФ спорт, туризм тата çамрăксен политикин министрĕ Виталий Мутко Шупашкарта Пăр кермен тăвакан вырăнта асăну чулне хурса хăварнă.

Аса илтеретпĕр, объекта ЧР Министрсен Кабинечĕпе «Газпром» АУО ертÿçисем йышăннă килĕшÿпе тăваççĕ. «Ку спорт центрĕ пулĕ, унта çынсем хоккейла çеç мар, спортăн ытти енĕпе - футболла, волейболла, баскетболла - выляма пултарĕç. Турнирсене харăсах 7 пин çурă çын сăнама пултарĕ», - тенĕ Президент.

Виталий Мутко республикăна çултан-çул ытларах шаннине, вăл спортпа туслă регионсен шутне кĕнине палăртнă.

 (авторĕ А.ЛЬВОВА)