Паян Чăваш Республикин Президенчĕ Михаил Игнатьев ĕçлĕ çул çӳревпе Шăмăршă районĕнче пулнă. Палтиел ял тăрăхĕн ĕçĕпе паллашнă. Ял тăрăхĕнче ĕçмелли шывсене тасатса кăларакан станцине тунă çĕрте ĕçлекенсемпе, ертӳçипе калаçнă. Республикăри тата Раççейри «Таса шыв» программăпа килĕшÿллĕн çакăнти шывпа республикăн кăнтăр енче вырнаçнă Шăмăршă, Патăрьел районĕсенчи тата Каçал енĕн пĕр пайĕнчи ялсене тивĕçтерме тытăнмалла. Сăмах май, проект тăрăх мăн плотина 84 яла татти-сыпписĕр шыв парса тăмалла, ун валли патшалăх вăйĕпе 300 километр «тымар» йĕркелемелле. Палăртнă станцие хута яма организаци 2012 çулта вĕçлеме тĕллев лартнă. «Мир» хупă акционерлă пĕрлешӳре Чăваш Ен Президенчĕ уй–хир ĕçĕсемпе кăсăкланнă. Вырмара çĕр ĕçченĕсем пикенсех ĕçлеççĕ. Хуçалăхра усă куракан çĕрсен лаптăкĕ 1885 гектар, вĕсенчен 485 гектар кĕрхисем, 1400 гектар çурхи культурăсем. Паянхи кун тĕлне 400 гектар çинчен тыр-пула пухса кĕртнĕ. Республика Президенчĕн тепĕр чарăнăвĕ Ярăслав ялĕнчи «Исток» ООО выльăх-чĕрлĕх ферминче пулнă. Çирĕп аталанакан хуçалăх кăçалхи çур çулта кашни 100 гектар пуçне 30,8 центнер какай, 337,8 центнер сĕт туса илнĕ. Мăйракаллă шултра выльăх йышĕ 400 пуç ытла. Çакă та чикĕ мар-ха. Çывăх кунсенче Беларуç Республикинчен тепĕр 150 пуç хура-шурă ăратлă пушмак пăрусем илсе килме палăртнă. Кунсăр пуçне хуçалăх 200 пуç сăвакан ĕне тытмалли сĕт-çу фермине /кунтах вăкăр самăртаççĕ, ĕнесене пăрулаттараççĕ/ реконструкци тумалли инвестици проектне пурнăçлама пикеннĕ. Икĕ-виçĕ уйăхран кунта хальхи пурнăç ыйтăвĕсене тивĕçтерекен сĕт-çу завочĕ çимĕç кăларма та тытăнĕç. Юлашкинчен районти пĕтĕм активпа пĕрле Чăваш Ен Президенчĕ районăн социаллă пурнăçпа экономика аталанăвĕн пĕрремĕш çур çулхи кăтартăвĕсене пĕтĕмлетнĕ. Стратеги - 2020 пурнăçлассине пăхса тухнă, муниципалитет аталанăвĕн малашлăхне палăртнă. Чăваш Ен Президенчĕ Михаил Игнатьев канашлăва пĕтĕмлетнĕ май вырăнти пуçлăха ытларах çĕнĕ йышши инвестици поекчĕсене пурнăçа кĕртсе пыма хушса хăварнă тата çавăн пекех пăчĕк тата вак предпринимательлĕхе аталантарса пыма май тупса памаллине палăртнă.