Чăваш халăхĕн мухтавлă ывăлне Андриян Григорьевич Николаева асăнса
Шăп 49 çул каялла, 1962 çулхи çурла уйăхĕн 11-мĕшĕнче, Андриян Григорьевич Николаев тĕнче уçлăхне вĕçнĕ. Сакăр çултан, 1970 çулхи утă уйăхĕнче, вăл космоса тепĕр хут парăнтарнă, уçлăхра 17 талăк та 17 сехет пулнă, ку вăхăт ун чухне чи вăрăмми шутланнă. Чăваш çĕрĕнче çуралнă виççĕмĕш номерлĕ космонавт наци паттăрĕ кăна мар, пĕтĕм тĕнче пĕлекен тата юратакан çын пулса тăнă. Пирĕн ентеш хăйĕн пархатарлă ĕçĕсемпе Раççейĕн тата ют çĕршывсен вун-вун наградине тивĕçнĕ. Чăваш Енĕн Паттăрлăхпа Ĕç Мухтавĕн Хисеплĕ Кĕнекине унăн хушаматне чи малтан кĕртнĕ. Андриян Григорьевич Николаев – пирĕн республикăн, Калуга, Каспийск, Махачкала, Нальчик, Ржев, Смоленск, Гюмри, Караганда, Дархан, София, Варна, Петрич, Плавен, Карловы Вары, Буир хулисен Хисеплĕ гражданинĕ. Уйăхăн тепĕр енчи кратерĕ, Франц Иосиф Çĕрĕ архипелаг çинчи пăрлă купол, Антарктидăри ту хысакĕ, пăрахутсем, нумай-нумай урампа шкул, çамрăк космонавтсен отрячĕ Чăваш Енĕн çăлтăрлă ывăлĕн ячĕпе хисепленсе тăраççĕ. Авăн уйăхĕн 5-мĕшĕнче, СССР летчик космонавчĕ, авиацин генерал-майорĕ, Совет Союзĕн икĕ хут Геройĕ, Чăваш Республикин Хисеплĕ гражданинĕ Андриян Григорьевич Николаев çуралнă кун, Шупашкарта палăк уçма палăртнă. Çак монумент – Космонавтика скверĕн пуçламăшĕ, вăл пирĕн ентешĕмĕрĕн пархатарлă ĕçĕсемпе паттăрлăхне кăтартакан символ пулса тăрĕ. Композици тĕлĕшĕнчен скульптура – чăн-чăн халăх палăкĕ, мĕншĕн тесен ăна хатĕрлесе вырнаçтарма Чăваш Республикинче пурăнакансем çеç мар, Раççейĕн тĕрлĕ регионĕнче пурăнакан ентешсем те укçа-тенкĕ пуçтараççĕ. Акă, сăмахран, Ульяновск хулинчи пысăках мар предприяти ертÿçи Дмитрий Кузьмин 20000 тенкĕ куçарнă, Инçет Хĕвел тухăçĕнчи ветерансем виçĕ пин ытла тенкĕ укçа пуçтарнă. Çак кунсенче кăна-ха республикăри ветерансен Канашне Шупашкар хулинчен пĕр пенсионер шăнкăравланă, хăй тухса çÿреймен пирки палăк валли пама уйăрса хунă укçана хваттерне пырса илме каланă.
Чăвашăн авалран пыракан йăлине – нимене – тытса пырса паттăр та мухтавлă ентешĕмĕрĕн ятне халăхра ĕмĕрлĕх хăварма кашниех пулăшма пултарать.
Расчетлă счет çине укçа куçарнă чухне «Добровольное пожертвование на установку памятника А.Г.Николаеву» тесе çырмалла.
Реквизитсем:
ИНН 2127327480 КПП 213001001
Чăваш Енĕн социаллă пĕлтерĕшлĕ тата культура программисене пулăшмалли Фондăн коммерциллĕ Маар организацийĕ
Филиал ОАО Банк АВБ в г.Чебоксары
Р/с № 40703810600000000081
К/с. № 30101810800000000714
БИК 049706714
ОГРН 1032127013071
Ыйтусене çак адреспа пама пулать: Шупашкар хули, Мир проспекчĕ, 90/1. т: 62-04-81. Email, fond@cap.ru