Чăваш Ен Пуçлăхĕ Михаил Игнатьев Тăвай тăрăхĕнче пулнă
Çак кунсенче Чăваш Ен Пуçлăхĕ Михаил Игнатьев Тăвай тăрăхĕнче пулчĕ. Район администрацийĕн ертÿçин пуканне Юрий Васильев йышăннăранпа çĕнĕ улшăнусем куç умĕнчех: ялсенче çĕнĕ предприятисем вăй илме тытăннă. Çакна Михаил Васильевич хăй курса ĕненчĕ. Çĕнĕ Пуянкассинче 2009 çулхи çурла уйăхĕнче «Буяновский» ООО йĕркеленĕ. Общество тимĕртен тата йывăçран тĕрлĕ тавар - хыçсăр тата хыçлă пукан... - туса кăларать. Пĕлтĕр вĕсене 2010 çулхинчен икĕ хут ытларах ăсатнă, рабочисен йышĕ хушăннă, ĕç укçи 1,44 хут ÿснĕ. Гендиректор Валентина Анастасьева пĕлтернĕ тăрăх - «Буяновский» общество кăçал производствăна малалла сарас, çĕнĕ чикĕсем палăртас тĕллевлĕ.Тăвайĕнче нумай хваттерлĕ кивĕ çуртсене çине тăрсах юсаççĕ. Республика Пуçлăхĕ Ленин проспектĕнчи 10-мĕш çурта епле çĕнетнипе паллашрĕ. Район больницинче пулнă хыççăн анлă ларăва хутшăнчĕ. Унта Тăвай районĕн 2011 çулхи социаллă пурнăçĕпе экономика аталанăвне пĕтĕмлетрĕç, 2012 çул валли тĕллевсем палăртрĕç.