Элĕк районĕ: йĕкĕрешсем «вĕçсе» килнĕ
Ĕлĕк-авалах йĕкĕрешсем çуралсан пысăк савăнăç пулнă. Пĕр ача çуралсан та ашшĕ-амăшĕ питĕ хĕпĕртет те, икĕ ача тÿрех çут тĕнчене килсен - иккĕлле савăнăç.
Акă, Тавăтра пурăнакан Дмитрийпе Любовь Саватинсен çемйинче тÿрех икĕ хĕр ача кун çути курнă. Ашшĕ-амăшне Каринăпа Камилла çуралнине ĕнентерекен свидетельствăсем панă. Районти ЗАГС пайĕн ертÿçи Мария Николаева район администрацийĕн пуçлăхĕ ячĕпе савăнăçлă лару-тăрура çемьене тăваттăмĕш тата пиллĕккĕмĕш «кайăк» вĕçсе килнĕ ятпа ăшшăн саламланă, лайăх воспитани парса ачасене сывлăхлă çитĕнтерме ăнăçу суннă. «Çемье – пурнăçра вăй-хал парса тăракан çăл куç пулса тăнине палăртнă. Çавăн пекех телейлĕ ашшĕ-амăшĕпе амăшĕн капиталне илмелли йĕркесем çинчен калаçнă.
Тăван килте пĕчĕк хĕр пĕрчисене ашшĕпе амăшĕ кăна мар, вĕсен аслă пиччĕшĕсем те – Сергей, Максим тата Данил пăхĕç.