Елчĕк районĕ: К.В.Иванов ячӗпе хисепленекен Чǎваш академи драма театрӗнче пулчӗç
Çак кунсенче Елчӗк районӗнчи Курнавǎшри пӗтӗмӗшле пӗлӳ паракан вǎтам шкулта вӗрентекенсем Шупашкарти К.В.Иванов ячӗпе хисепленекен Чǎваш академи драма театрӗнче Ф.Павлов çырнǎ «Ялта» спектакле кайса курчӗç. Пултаруллǎ çыравçǎ драмǎра ӗлӗкхи чǎваш ялӗнче пулса иртекен ӗç-пулǎма ӗнентерӳллӗ сǎнласа кǎтартнǎ. Империализм вǎрçине пула Елюкпа Ванюкǎн телейӗ пӗр туххǎмрах чǎл-пар саланса каять. Елюк, мǎшǎрӗ вǎрçǎра вилнӗ тесе, улталанса Çтаппана качча тухать. Туй вǎхǎтӗнче Ванюк хǎйӗн юратнǎ çыннине персе вӗлерет. Куракансене Елюкпа Ванюкǎн телейсӗр шǎпи шухǎша ячӗ. Спектакльре ӗлӗкхи чǎваш вǎййи-çуйне, юрри-такмакне илемлӗн кǎтартса панине палǎртмалла. Ванюк рольне вылякан В. Карпов артист калǎпланǎ сǎнар уйрǎмах асра юлмалла пулса тухнǎ.
«Ялта» спектакль пурин кǎмǎлне те кайрӗ.