Чăваш Республикин Пуçлăхĕ Михаил Игнатьев Чăваш Ен Патшалăх Канашĕнчи депутатсен фракцийĕсен ертÿçисемпе тĕл пулнă. Анатолий Князев /«Пĕрлĕхлĕ Раççей»/, Игорь Моляков /«Тĕрĕслĕхшĕн тăракан Раççей»/, Дмитрий Евсеев /РФ КП/, Андрей Кулагин /РЛДП/ канашлура республикăн социаллă пурнăçĕпе экономика аталанăвĕн тата ытти сферăпа отрасльти ыйтусене çĕкленĕ. Канашлăва Чăваш Республикин Патшалăх Канашĕн Председателĕ Юрий Попов та хутшăннă.

Çĕкленĕ ыйтусен анлăшĕ пысăк. Сăмахран, либерал-демократсен регион ертÿçине Андрей Кулагина парти мероприятийĕсене Шупашкарти «Мир Луксор» кинотеатр умĕнче ирттересси кăсăклантарнă. Унăн шухăшĕпе, хула администрацийĕ çапла тума ирĕк памасть имĕш. Çавăнпа пĕрлех вăл кадрсен резервне хатĕрлесси пирки сăмах пуçарнă, унта асăннă парти представителĕсене те кĕртме сĕннĕ. Михаил Игнатьев депутат ыйтăвне хуравласа патшалăх органĕсенчи должноçсене йышăнма конкурс тăтăш ирттерни, унта пурте хутшăнма пултарни, çав шутра оппозицири парти çыннисен те тулли ирĕк пурри çинчен пĕлтернĕ. Чи кирли - вĕсем чăн-чăн профессионалсем пулмалла.

Дмитрий Евсеев коммунист унччен ача-пăча сачĕсем пулнă çуртсене муниципалитетсене тавăрса пама, вĕсемпе тÿрĕ пĕлтерĕшпе усă курма сĕннĕ. Депутата ял хуçалăх таварĕсене сутмалли хак пĕчĕкки, шкул автобусĕсемпе тĕлсĕр çĕрте усă курни, ял çыннисене çур акине ирттерме çунтармалли-сĕрмелли материалсемпе çителĕклĕ тивĕçтересси хумхантарать. Республика Пуçлăхĕ ыйтусене тулли хуравланă, патшалăх çĕр ĕçченĕсене мĕнле пулăшнипе, минерал удобренисем, топливо туянма субсидисем уйăрнипе паллаштарнă.

Игорь Моляков улталаннă пайçăсен ыйтăвне татасси мĕнле пынипе кăсăкланнă. Чăваш Ен Пуçлăхĕ çитес икĕ çулта вăл пĕтĕмпе татăлассине пĕлтернĕ.

«Эпир пурте Чăваш Республикинчи халăхсен тăнăçлăхĕшĕн ĕçлетпĕр, çавăнпа вĕсен пурнăç условийĕсен пахалăхĕшĕн пирĕн пурин те пĕрле вăй хумалла», - тенĕ Михаил Игнатьев тĕл пулăва пĕтĕмлетсе. (О.Шашкова)