Пензăра федерацин Атăлçи округĕн сетокан енĕпе чемпионат иртнĕ. 12 регионти 600 каратист çĕнтерÿшĕн кĕрешнĕ. Чăваш Енĕн пĕрлештернĕ командинче Шупашкарти «Будокан» тата «Коршун» клубсенче ăсталăх пухакансем вăй виçнĕ. Республика чысне хÿтĕленĕ

18 спортсменран 15-шĕ медальпе таврăннă.

Сетокан Японире кун çути курнă, Раççейре ăна 2007 çулта çеç спорт дисциплинисен йышне кĕртнĕ. Çĕр-шывăн пĕрлештернĕ командин капитанĕ - Шупашкар районĕнчи Чаканарта çуралса ÿснĕ Дмитрий Фомиряков. Вăл тĕнчен виçĕ, Европăн вун виçĕ хут чемпионĕ, нацин çапăçу искусствин «Ылтăн пиçиххи» преми лауреачĕ. 32 çулти ентеш халĕ те ăмăртусене хутшăнать. Тупăшусенче вăй виçнипе пĕрлех «Будокан» клубра çамрăк ăрăва сетокан енĕпе ăсталăх парать. Дмитрий Фомиряков - педагогика ăслăлăхĕсен кандидачĕ, хĕвел тухăç кĕрешĕвĕн Чăваш Республикинчи федерацийĕн председателĕ.

- Дмитрий Викторович, Чăваш Ен спортсменĕ­­сен Пензăра иртнĕ чемпионатри кăтартăвĕсене мĕнле хаклатăр?

- Пирĕн ачасемпе çамрăксем ăнăçлă вăй виçрĕç. Анчах лайăхрах кăтартусем тума пултаракансем те пурччĕ. Çавăнпа та йăнăшсене тÿрлетсе тĕллевлĕрех ĕçлемелле. Çав вăхăтрах ачасем кĕтмен çĕнтерÿсемпе те савăнтарчĕç. Акă 18-20 çулсенчисен ушкăнĕнче Вадим Балятин ăмăртрĕ. Вăл 14 çултах Раççей чемпионĕ пулнăччĕ, анчах юлашки вăхăтра чирленĕ пирки тренировкăсене сиктерчĕ. Апла пулин те Вадим кумитэ енĕпе «кĕмĕл» призер ятне тивĕçрĕ. 9 çулти Артем Осипов çакăн йышши ăмăртура пуçласа малтисен йышне кĕчĕ. Вăл кумитэ ăмăртăвĕнче «ылтăн», ката тупăшăвĕнче «кĕмĕл» çĕнсе илчĕ. 13 çулти Никита Беловощев яланхиллех ăсталăхпа палăрчĕ - ката енĕпе пĕрремĕш пулчĕ.

- Никита Беловощев тĕнчери турнирсенчен çĕнтерÿсемпе таврăннипе пĕлетпĕр. Унпа тĕп­­лĕ­­н­­­­­рех паллаштарсамăр...

- Никита 6 çултанпа карате енĕпе ăсталăх пухать. Уншăн чи пĕлтерĕшлĕ турнир - пĕлтĕр Тайландра иртнĕ тĕнче чемпионачĕ. Никита унтан «бронза» призер пулса таврăнчĕ. Вăл - Раççейри ачасен пĕрлештернĕ командин членĕ. Халĕ ачасен çу уйăхĕ­­нче Парижра иртекен Европа ăмăртăвне хатĕрленет. Пĕлтĕр вăл унта чемпион пулнăччĕ.

- Дмитрий Викторович, эсир сетокан енĕпе Раççей спортсменĕсенчен тĕнчен пĕрремĕш чемпионĕ. Карате спортне мĕнле лекрĕр?

- Аслă пиччесен тĕслĕхĕпе. 1998 çулта Европа чемпионатĕнче, 2003, 2005, 2007 çулсенче тĕнче чемпионачĕсенче çĕнтертĕм.

- Хăш ăмăрту сирĕншĕн чи йывăрри пулчĕ?

- 2003 тата 2007 çулсенчи çĕнтерÿсем пĕлтерĕ­­шлĕ­­рех. Вĕсенче уйрăм спортсменсен хушшинче мала тухрăм. 2005 çулта - Раççей команди йышĕнче. 2007 çулта пирĕн çĕр-шыв каратисчĕсенчен пуçласа сетокан енĕпе спортăн тава тивĕçлĕ мастерĕн виçине тултартăм.

- Калаçушăн тавтапуç. /мăртусенче ăнăçу сунатпăр.

Татьяна ТИМУКОВА