Чăваш Республикин Пуçлăхĕ Михаил Игнатьев ĕç коллективĕсене тухса çÿресси йăлана кĕчĕ. Виçĕм кун вăл тата хула пуçлăхĕ Леонид Черкесов Наци библиотекинче патшалăх тытăмĕнчи вулавăш ĕçченĕсемпе тĕл пулчĕç.

Зала кĕрсенех пикесен тĕнчине лекнĕрен Михаил Васильевич пĕр самант çухалса кайнă пек те пулчĕ: «Сирĕн хушăра пĕр арçын та çук-и?» - тесе ыйтрĕ.

Темле хуравламалла: библиотекарь профессийĕ хĕрарăмсене çеç кăсăклантарать тени те тĕрĕс мар-ха. Арçынсем ытларах чухне вăй-халпа çыхăннă ĕçе кăмăллаççĕ тенинче те тĕрĕслĕх çĕр проценчĕпех мар. «Çемье пуçĕн тупăшлăрах вырăнта вăй хумалла, ачи-пăчине çитĕнтермелле, çурт-йĕре тытса тăмаллах», - тени вырăнлăрах пулĕ. Шел те, хальлĕхе библиотекарĕн ĕç укçипе - 10933 тенкĕ /иртнĕ çулхи кăтарту, кăçал ÿстерсен 11175 тенкĕ/ - ăна та, кăна та пурнăçлама йывăртарах килĕ. Çавăнпа та вулавăшсенче укçаран ытларах хăйĕн ĕçне парăннă çынсем вăй хуни вăрттăнлăх мар.

ЧР культура министрĕ Роза Лизакова пĕлтернĕ тăрăх - çак тĕл пулăва патшалăх тытăмĕнчи виçĕ вулавăшри 148 çын хутшăнать. Пархатарлă ĕçĕсемшĕн 13-шĕ ЧР культурăн тава тивĕçлĕ ĕçченĕн ятне илнĕ, Наци библиотекин директорĕ Светлана Старикова - Раççей культурăн тава тивĕçлĕ ĕçченĕ. Асăннă коллективсенче çамрăк йышлă: 21 процент, 50 çула çитменнисем - 45 процент.

Наци библиотекин директорĕ Светлана Старикова çурта реконструкцилени тата хальхи йышши хатĕрсемпе пуянланни кÿнĕ хăтлăхсем пирки чарăнса тăчĕ. Вăл çакна темиçе тĕслĕхпе çирĕплетрĕ. Вулавçăсен йышĕ ÿснинче çеç мар, кунта йĕркелекен мероприятисен пахалăхĕнче те палăрать çакă. Юридици çутлăхĕ енĕпе тÿлевсĕр консультаци ирттересси, пенсионерсене, сахал тупăш илекенсене компьютерпа ĕçлеме вĕрентесси, ытти регионтан килекенсене ĕç опычĕпе паллаштарасси çĕнĕлĕх мар ĕнтĕ. 1938 çултанпа вулавăшра тавра пĕлÿ уйрăмĕ ĕçлет, унта çĕнĕ йышши техникăпа усă курса уйрăмах пысăк пĕлтерĕшлĕ документсене цифра çине куçарассине йĕркеленĕ. Çапла майпа вĕсем нумай çул упранĕç.

Иртнĕ çул Наци библиотекине йĕркеленĕренпе 140 çул çитнĕ. Çавна май вулавăшра кăсăклă вун-вун мероприяти иртнĕ. Çавнашкаллисенчен пĕринпе - çамрăк библиотекарьсен Пĕтĕм Раççейри IV форумĕ пирки Дарья Рябцева /вăл - республикăри çамрăк библиотекарьсен канашĕн ертÿçи/ каласа кăтартрĕ. Унта 26 регионтан 200 ытла специалист хутшăннă.

Республика Пуçлăхĕ çавăн пекех Чăваш Енри ачасемпе çамрăксен библиотекин директорĕ Тамара Григорьева, республикăри Л.Н.Толстой ячĕллĕ ятарлă библиотека /куç япăх куракансем валли/ директорĕ Лилия Васильева пĕлтернисене те итлерĕ.

Михаил Игнатьев çакăн хыççăн хăй ыйтусем пама пуçларĕ: ĕçе лайăхлатас тесен тата мĕн тăвас тетĕр, мĕнле чăрмавсем пур?

Ку енĕпе Л.Н.Толстой ячĕллĕ вулавăш директорĕ çурта республика пурлăхĕ çине куçарассипе çыхăннă пăтăрмаха татса пама пулăшмашкăн ыйтрĕ. Хула пуçлăхĕ Леонид Черкесов ку ыйтăва çу уйăхĕччен татса пама шантарчĕ. Çак вулавăшрах ĕçлекен Николай Парахин /вăл куç япăх куракансене компьютера алла илме пулăшать, хăй те çак енĕпе инвалид/ компьютер хатĕрĕсем çитменнине пĕлтерчĕ. Михаил Игнатьев ку енĕпе те пулăшма шантарчĕ. «Халăхшăн тăрăшасси - пирĕн тĕллев, - терĕ. - Йывăр шăпаллисене пулăшни - уйрăмах пархатарлă ĕç».

Михаил Игнатьев ĕçре палăрнисене Тав хучĕпе чысларĕ. Çак чыса Елена Денисова, Ирина Яковлева, Татьяна Баймушкина тивĕçрĕç. Алена Падуковăна, Нина Колбасовăна тата Дарья Рябцевăна вара вĕсем ЧР Пуçлăхĕн стипендине тивĕçнине ĕнентерекен свидетельство пачĕ.

(Н.Смирнова)