Культура ĕçченĕн кунне Раççейре пиллĕкмĕш çул паллă тăваççĕ. Чăваш культури те этемлĕхшĕн пысăк пĕлтерĕшлĕ. Эпир хамăрăн ăс-хакăлпа, йăла-йĕркепе, халăх пултарулăхĕнчи çитĕнÿсемпе чăннипех мăнаçланма пултаратпăр. Чăваш Енри ултă театр, виçĕ концерт организацийĕ, патшалăхăн виçĕ музейĕ тата унăн пилĕк филиалĕ, муниципалитетăн сакăр музейĕ, ял тăрăхĕсенчи 35 музей, 554 вулавăш, культурăпа канăвăн 817 учрежденийĕ тата ыттисем республикăмăрăн культура вучахне хĕмлентерсе тăраççĕ. Пуш уйăхĕн 23-мĕшĕнче Культура ĕçченĕн кунне анлă паллă турĕç. Чăваш патшалăх филармонине пухăннисене ЧР Пуçлăхĕ Михаил Игнатьев тата ЧР культура министрĕ Роза Лизакова саламларĕç. - Пирĕн тытăмра паян 8 пин ытла çын вăй хурать. Сирĕн пысăк та пархатарлă, тухăçлă ĕçĕре пула куракансен, искусствăпа культурăна хаклама пĕлекенсен йышĕ ÿссех пырать. Культура ĕçченĕ вăл - анлă тавра курăмлă, пурнăç, çут çанталăк илемне курма, ăнланма пĕлекен çын, - тенĕ Роза Михайловна. Палăртса хăваратпăр: паянхи кун тĕлне республикăри 48 культура çуртне тĕпрен çĕнетнĕ, 60 клуба юсанă. Ку ĕç кăçал та тăсăлĕ: 18 учрежденипе тата 35 клуба çĕнетме республика бюджетĕнчен 29 млн тенкĕ уйăрнă. Ĕçне кура - хисепĕ. Çулталăк пуçланнăранпа культура тытăмĕнче тăрăшакан 15 çынна Чăваш Республикин патшалăх наградипе чысланă. - Çынсене савăнăç парнеленĕшĕн, халăхăмăн культурине, йăли-йĕркине упраса парăннăшăн тав тăватăп. Сирĕн пултарулăхăр ан иксĕлтĕр, - тенĕ Чăваш Ен Пуçлăхĕ Михаил Игнатьев наградăсем панă май. Уяв пысăк концертпа вĕçленнĕ.