Ыран - Чăваш Республикин Патшалăх символĕсен кунĕ
1992 çулхи ака уйăхĕн 29-мĕшĕнче Аслă Канашăн йышăнăвĕпе Чăваш Республикин патшалăх символĕсен положенийĕсене çирĕплетнĕ.
Çĕнĕ Гербпа Ялав çинчен Положенин малтанхи статйисенче тĕплĕ çырса кăтартнă. 1997 çулхи утă уйăхĕн 1-мĕшĕнче «Чăваш Республикин патшалăх символĕсем çинчен» саккунпа килĕшÿллĕн вĕсем официаллă вăя кĕнĕ. Çав вăхăтрах Чăваш Республикин Конституцине улшăнусем кĕртнĕ.
Гербпа Ялав авторĕ - Чăваш Республикин тава тивĕçлĕ художникĕ Элли Михайлович Юрьев.
Чăваш Республикин Патшалăх ялавĕ Чăваш Патшалăхĕн символĕ шутланать.
Чăваш Республикин Патшалăх ялавĕ - тăватă кĕтеслĕ пусма, унăн енĕсем 5:8 виçепе шайлашуллă, горизонтальпе икĕ пая пайланнă: çулти - сарă тĕслĕ, аялти - тĕксĕм хĕрлĕ /пурпур тĕслĕ/. Варринче герб эмблемисем - «Пурнăç йывăçĕ» /Чĕрĕлсе вăй илнин символĕ/ тата «Виçĕ хĕвел».
Чăваш Республикин Патшалăх гербĕ - Чăваш Республикин патшалăх суверенитечĕн символĕ, унăн официаллă эмблеми.
Чăваш Республикин Патшалăх гербĕ - тĕксĕм хĕрлĕ «Пурнăç йывăçĕ» /Чĕрĕлсе вăй илнин символĕ/ эмблемăн ылтăн тĕслĕ, йĕри-тавра йăрăмланă геральдика щичĕ çинчи ÿкерчĕк. Геральдика щитне икĕ пая уйăрнă: аялти пайĕ Чăваш çĕр-шывне пĕлтерет. Щита Чăвашсен авалхи «Виçĕ хĕвел» эмблемипе тăрăланă.
Щита ылтăнпа илемлетнĕ тĕксĕм хĕрлĕ хăюпа çавăрса илнĕ. Хăю çине ылтăн сас паллисемпе «Чăваш Республики - Чувашская Республика» тесе çырнă, хăю вĕçĕсенче хăмла ÿкерсе хунă. Геральдика щичĕн тĕпĕ Чăваш çĕрне пĕлтерет.