Республика Пуçлăхĕ Михаил Игнатьев Шупашкарти “Полимер Инновация” обществăна çитсе килнĕ
Республика Пуçлăхĕ Михаил Игнатьев Шупашкарти “Полимер Инновация” обществăна çитсе курнă. Унăн производство объекчĕсем пысăк мар: пĕр хутлă икĕ цех, склад. Пĕтĕмпе 30 çын вăй хурать. Кунта питĕ кирлĕ продукци туса кăлараççĕ. Унпа ял хуçалăхĕнче те усă кураççĕ.Сăмах - полиэтилен пленки пирки. Иртнĕ ĕмĕрте ăна республикăна тулашран турттарнă. Халĕ Шупашкарта та хатĕрлеççĕ.Сергей Фадеев директор ĕç меслечĕпе паллаштарнă. - Пĕчĕк предприятие ĕçлеттерсе яма патшалăх хыснинчен 3 млн тенкĕлĕх субсиди патăмăр, - тенĕ Михаил Игнатьев. - Общество кредит та илнĕ. Паян унăн ĕç-хĕлне хаклама ятарласа килтĕм. Вăл производствăна çуллен ÿстерсе пынине, пĕлтĕр 50 млн тенкĕлĕх тупăш илнине, ăна 8 региона ăсатнине пĕлтĕм. Предприяти каяшран паха тавар туса кăларас, çынсене ĕç вырăнĕпе тивĕçтерес тĕлĕшпе муниципалитет влаçĕшĕн те, пĕчĕк бизнесшăн та - ырă тĕслĕх. Унпа районсенче усă курасса шанатăп. Ялсенче çĕр-çĕр тонна кивĕ кĕленче савăт-сапа, кантăк пухăнса кайнă. Ăна ĕçе кĕртекен цехсем питĕ кирлĕ. Кăçал бизнеса аталантарма 25 млн тенкĕлĕх субсиди уйăратпăр. Предпринимательсене тĕрлĕ производство йĕркелеме пулăшăпăр.Михаил Васильевич çак производство пирки журналистсем мĕн шухăшланине пĕлесшĕн пулчĕ.- Унтан усси пысăк, - тернĕ вĕсем. - Ăна Шупашкарта çеç мар, районсенче те йĕркелемелле. Полиэтилен пленка - вырăнтах, кÿршĕ регионсенчен турттарас çук.Рабочисем кашни уйăхра вăтамран 15 пин тенкĕрен кая мар ĕç укçи илеççĕ. Производствăна виçĕ сменăпа йĕркеленĕ.- Çапах та пирĕн тавара ытларах Шупашкарти предприятисем туянаççĕ, - пĕлтернĕ директор.