Ĕнер ЧР Пуçлăхĕ Михаил Игнатьев Министрсен Кабинечĕн членĕсемпе, федераци ведомствисемпе муниципалитетсен территори органĕсен ертÿçисемпе канашлу ирттернĕ.

ЧР экономика аталанăвĕн, промышленноçпа суту-илÿ министрĕ Алексей Табаков республикăн пайăр инвестици программине 2012 çулхи кăрлач-ака уйăхĕсенче мĕнле пурнăçлани çинчен пĕлтернĕ. Кăçал çак программа валли республика бюджетĕнчен 2 млрд та 867,8 млн тенкĕ яма пăхнă.

Министр каланă тăрăх 2012 çулта 8 ача садне, пĕтĕмĕшле пĕлÿ паракан 3 шкула, физкультура, сывлăха çирĕплетмелли 2 комплекса /Хĕрлĕ Чутай тата Тăвай районĕсенче/, пысăк пĕлтерĕшлĕ ытти объекта хута ямалла. Çĕнĕ Шупашкар хулинче шкул çулне çитменнисен вĕренÿ учрежденийĕн çуртне çĕклес, Шупашкарта ЧР Патшалăх истори архивĕн çуртне, Çĕнĕ Шупашкарта биологи тĕлĕшĕнчен тасатакан объектсене юсас, республикăри ял-хулари çĕнĕ урамсене электрификацилес, йăлари хытă йышши каяшсем валли полигон тăвас енĕпе çителĕксĕр ĕçлеççĕ.

Алексей Табаков хăйĕн докладĕнче автомобиль çулĕсем тăвас тата юсас ыйтусем çинче уйрăммăн чарăнса тăнă. 2012 çулта Чăваш Ене çак тĕллевпе 800 млн тенкĕ уйăраççĕ.

Кунсăр пуçне Республикăри усал шыçăсенчен сипленмелли клиника диспансерĕн хирурги корпусне тумалли ĕçсене хăвăртлатас ыйтăва çĕкленĕ. ЧР Пуçлăхĕ Çĕнĕ Шупашкарта ача сачĕ тăвас ĕçе вăраха янăшăн критикленĕ. «Эпир ача сачĕсем тĕлĕшпе тухса тăнă ыйтăва 3 çулта татса пама шантартăмăр. Çак тĕллевпе бюджетран укçа-тенкĕ уйăратпăр, унпа тивĕçлипе усă курмаççĕ. Патшалăх тата муниципалитет подрядчикĕсен ăнăçлă ĕçлекен пайтаçăсенчен тĕслĕх илмелле», - тенĕ М.Игнатьев.

Канашлура патшалăх тата муниципалитет пулăшăвĕн ĕçĕсене электрон йĕрки çине куçарас, ведомствăсен хушшинче электрон хутшăнăва йĕркелес ыйтупа ЧР Патшалăх çыхăнупа информатизаци комитечĕн председателĕ Николай Озеров доклад тунă. Хальхи вăхăтра Чăваш Республикинче 19 пулăшу ĕçне электрон йĕркипе пама йышăннă. ЧР Патшалăх тата муниципалитет пулăшăвĕн ĕçĕсен порталĕнче пулăшу ĕçĕсен 459 тĕсне вырнаçтарнă. Николай Озеров палăртнă тăрăх 2012 çулта пулăшу ĕçĕсене электрон йĕрке çине куçарас тĕлĕшпе малалла тăрăшĕç.

Михаил Игнатьев «пĕр чÿрече» принциппа патшалăх пулăшăвĕсем илекен граждансен йышне ÿстермеллине палăртнă.

Часах - отпусксен, каникул тапхăрĕ. Халăх юхан шывсен, кÿлĕсемпе пĕвесен хĕрринче канма пуçлĕ. Çавна май канашлура шыва кĕмелли вăхăта хатĕрленес ыйтăва сÿтсе явнă. ЧР Граждан оборони тата чрезвычайлă лару-тăру патшалăх комитечĕн председателĕ Юрий Кекиш пĕлтернĕ тăрăх вырăнти хăй тытăмлăх органĕсем 17 пляжпа шыва кĕмелли вырăнсем уçма палăртаççĕ. Çĕнĕ Шупашкарта пляж уçас ыйту çивĕч. «Ăна кĕске вăхăтра татса памалла», - тенĕ М.Игнатьев хула влаçĕсен умне тĕллев лартса.

В.ВАСИЛЬЕВ