Патăрьел районĕнчи Сăкăт шкулĕнче пĕрремĕш класра вĕренекенсем паян Анюрова А.В. класс ертÿçипе пĕрле Кĕнекесен тĕнчинче - библиотекăра хăнара пулчĕç. Пысăк та хăтлă залра капăр стеллажсем çинчен пĕчĕк шăпăрлансем çине çĕршер те çĕршер кĕнеке йăл-йăл кулса пăхаççĕ пек: "Акă пирĕн çĕнĕ туссем çитрĕç! Килĕрех, иртĕрех! Атьăр, паллашар, туслашар!", тенĕ - библиотека хуçи.  В.Н.Тестова çĕнĕ хăнасене хапăл туса йышăнчĕ, кăтартса, ăнлантарса пачĕ - библиотекăпа тĕплĕн паллаштарчĕ. Мĕн тĕрлĕ кĕнеке çук-ши кунта! Çÿп-çÿхи те, мăнтăрри те, пĕчĕкки те, тем пысăкăшши те, тĕрлĕ тĕсли, тĕрлĕ ÿкерчĕкли... Кĕнекене шакăртаттарса вулама пĕлекенсем те пур иккен ачасем хушшинче. Хăшĕ-пĕри вуласа та кăтартрĕ. Хавас кăмăлпа таврăнчĕç пĕрремĕшсем класа. Библиотека питĕ килĕшрĕ вĕсене. Кĕçех акă, çĕнĕ сукмаксем те хывăнĕç библиотекăна. Çулĕ такăр пултăр, вулама юратакансен шучĕ чакса мар, ÿссе пытăр!