Михаил Игнатьев республика Пуçлăхĕ çумĕнчи Экономика канашĕн ларăвне ирттерчĕ. Малтанах Министрсен Кабинечĕн Председателĕ Иван Моторин тĕрлĕ çурт-йĕр тума ирĕк илессишĕн чупса çÿренĕ тата объекта хăпартнă тапхăрта чăрмав нумай тухса тăнăран инвестици проекчĕсене пурнăçа кĕртме йывăрланнă тĕслĕхсем çинчен каласа пачĕ.

Çирĕплетнĕ йĕркепе килĕшÿллĕн Чăваш Енре çĕр лаптăкĕ уйăрассипе, строительствăпа çыхăннă документсене 180 кунран кая хăвармасăр памалла. Анчах ăна пăхăнмаççĕ. «Шупашкарти Б.Хмельницкий урамĕпе çыхăнакан Сад районĕн проектне улшăну кĕртме çулталăка яхăн кирлĕ пулчĕ, - терĕ Иван Борисович. - «Чăваш Ен букечĕ» фирма логистика центрĕ туса лартнă лаптăка 2012 çулхи раштавранпа саккунпа килĕштереймест. Ыйтусене вăхăтра татса парайманран «ЭКРА» обществăн производство корпусне малтан палăртнинчен пĕр çул кая юлса уçрĕç. Документсене уйăрса панă тапхăрта йĕркене кĕртесси чиновниксем хăйсен тивĕçне тÿрĕ кăмăлпа пурнăçламаннинчен е ĕç пахалăхĕнчен килмен. Сăлтавĕ - строительство пуçламалли документсене япăх хатĕрлесе тăратнинче тата çурт-йĕр тума ирĕк памалли йĕрке çирĕпленсе çитменнинче».

ЧР электротехникăн инноваци кластерĕн пайташлăхĕн правленийĕн председателĕ Олег Саевич тата Шупашкарти электротехникăпа автоматика завочĕн ертÿçин çумĕ Наталья Кузина тĕп фондсем вырнаçнă лаптăка пысăклатнă чухне тухса тăнă йывăрлăхпа паллаштарчĕç.

Михаил Игнатьев «инвестици çулĕ çинче шăтăк-путăк пур пулин те производство йĕркелекенсен урапи малаллах шунине» палăртрĕ. Патшалăхпа муниципалитет органĕсенче вăй хуракансен предпринимательсене хăлха тăратсах итлемелле, мĕншĕн тесен бизнесменсем чиновниксене объектсенче мĕн пулса иртнине ăнланма пулăшаççĕ. «Эпир пĕр-пĕрин патне утăмласа çывхаратпăр, анчах çул çинче лакăм-тĕкĕм чылай-ха», - терĕ М.Игнатьев. Лаптăк илнĕ чух хăш-пĕр чиновникпа предприниматель ан коррупциленччĕр тесе ыйтусене патшалăхпа муниципалитет органĕсенче «пĕр чÿрече» йĕркипе е электрон мелпе татса парасси сарăлсах пырать.

Республика Пуçлăхĕ предпринимательсене производство объекчĕ тума ăçта лаптăк пуррине Интернета кĕрсе пĕлме тепĕр хут чĕнсе каларĕ. Пушă выртаканни - 94. Çывăх вăхăтра сайта кашнин планне уçăмлатакан информацие те вырнаçтарĕç.

ЧР экономика аталанăвĕн, промышленноç тата суту-илÿ министрĕн тивĕçне вăхăтлăха пурнăçлакан Владимир Аврелькин «Республикăна инвестици ытлăн-çитлĕн хывассине туллин тивĕçтерес тĕлĕшпе федераци субъекчĕн ĕç тăвакан влаç органĕн ĕç-хĕлĕн стандартне пурнăçа кĕртесси» ыйтупа доклад турĕ. Çĕнĕ проектсене çул пама стратеги пуçарăвĕ тăвакан агентствăн эксперт ушкăнĕн ертÿçи Владислав Семенов бизнесменсем валли пĕрлехи портал уçма, унта республикăн инвестици хăватне анлăн кăтартма сĕнчĕ. ЧР Суту-илÿпе промышленноç палатин президенчĕ Игорь Кустарин кун пек портал йĕркеленине, Чăваш Енри предпринимательсен правине хÿтĕлессишĕн яваплă Владимир Иванов çак кунсенче бизнесменсем валли йышăну пÿлĕмĕ уçассине пĕлтерчĕç. Михаил Игнатьев район-хула администрацийĕн пуçлăхĕсенчен хăйсен çумĕсенчен пĕрне инвестици ĕçне туса пымашкăн чÿк уйăхĕн 15-мĕшĕччен çирĕплетме ыйтрĕ.

Михаил СЕРЕГИН