Район 70 çул тултарнă май . 

 Пирĕн район историйĕ питĕ пуян, çавăнпа та унăн кашни страници - хăй тепĕр истори. Муркаш ене хаклакансем, юратакансем, район аталанăвĕн утăмĕсемпе интересленекенсем ытларах  чух вырăнти тавра пĕлÿçĕсем пулса тăраççĕ. Вĕсен ĕçĕсенче районăн несĕлĕ палăрать, малашлăх та курăнать.

 Анчах та кирек епле историре те тĕпчесе пĕлменнни пур. Тен, паян  пурăнакан аслă ăрури çынсем район историйĕпе çыхăннă, ку таранччен анлă сарăлман фактсем пĕлеççĕ. Тен, районпа çыхăннă паллă ĕçсем çине çамрăксем паян урăхларах хаклавпа пăхаççĕ... 

 Район 70 çул тултарнине халалласа çамрăк журналистсен конкурсне шăпах çак чăнлăхсене мала хурса йĕркеленĕ. «Муркаш районĕ: çамрăксен куçĕпе» конкурса валли хатĕрленĕ ĕçсене (жанр енĕпе чикĕлемен, текстпа пĕрле сăн ÿкерчĕксем пулнине ырлаççĕ кăна) «Çĕнтерÿ ялавĕ» хаçат редакцийĕнче тата район администрацийĕн информаципе тивĕçтерекен пайĕнче йышăнаççĕ.

 Октябрьте пуçланнă конкурса февраль уйăхĕнче пĕтĕмлетеççĕ. Мала тухнисене парнесемпе чыслаççĕ.