Республика парламенчĕн ĕнер иртнĕ 17-мĕш сессийĕнче Чăваш Ен Пуçлăхĕ Михаил Игнатьев Патшалăх Канашне янă Çырăвĕпе паллаштарчĕ.

Çыру текстне «Хыпар» туллин пичетленине кура унта çĕкленĕ темăсем çинче пайăррăн чарăнса тăни кирлĕ мар-тăр - ăна итлеме хутшăннисем республикăн социаллă пурнăçпа экономика аталанăвĕн ыйтăвĕсене тĕплĕн те анлăн çĕкленине палăртаççĕ. Республика экономикине инвестицисем хывассинчен пуçласа вĕрентÿпе сывлăх сыхлавĕн, спорт ыйтăвĕсем таранах - пур енĕпе те халĕчченхи ĕçе хакласа малашлăх тĕллевсем палăртнă. Çапах иртнĕ çулсенчи çырусенчен уйрăмми те пур: Михаил Васильевич культура ыйтăвĕсем çинче пайăррăн чарăнса тăчĕ. Çав шутра - чăваш чĕлхин, йăли-йĕркин шăпи-пуласлăхĕ. Хăйне евĕрлĕ самант: Çырăвăн самай вăрăм çак сыпăкĕпе Михаил Игнатьев чăвашла паллаштарчĕ. Халăхăмăрăн Çырăва кĕртнĕ ваттисен сăмахĕсене чăвашла калани пулнă, анчах кунашкалли - пуçласа.

Сессие Патшалăх Канашĕн депутачĕсемсĕр пуçне РФ Патшалăх Думин депутачĕ Валентин Шурчанов /Думăри хисеплĕ ытти ентеш те, пирĕн РФ Федераци Пухăвĕн çÿлти палатинчи сенаторсем те темшĕн курăнмарĕç/, ĕç тăвакан влаç органĕсен, федерацин территори органĕсен, муниципалитетсен ертÿçисем, тĕн конфессийĕсен пуçлăхĕсем, общество ĕçченĕсем, предприятисемпе организацисен, массăллă информаци хатĕрĕсен ертÿçисем хутшăнчĕç. Республика Пуçлăхĕн сехет те вунă минута тăсăлнă вулавне Чăваш наци телекуравĕ, «Раççей 24» канал, Наци радиовĕ, «Тăван радио» эфирĕнче тÿрремĕнех трансляциленине кура, паллах, интересленекен кашни çын итлеме пултарчĕ. Сăмах май, республика Пуçлăхĕ Патшалăх Канашне яракан çулленхи Çырупа паллаштарнине телекурав тепĕр хут кăтартĕ: «Раççей 1» телеканал - раштавăн 19-мĕшĕнче 9 сехетре, «Раççей 24» - раштавăн 22-мĕшĕнче 19 сехет те 30 минутра.