Пуш уйăхĕн 18-мĕшĕнче Чăваш Ен Пуçлăхĕ Михаил Игнатьев Владимир Николаевич Иванова Чăваш Республикинчи Предпринимательсен прависене хÿтĕлекен уполномоченнăй пулмашкăн шанни çинчен калакан Указа алă пуснă.

Михаил Игнатьев Владимир Иванов кандидатурине Чăваш Ен общественноçĕ ырланине пĕлтернĕ. Вăл çавăн пекех регионри Предпринимательсен прависене хÿтĕлекен института предпринимательсен пуçарулăхне хушма пулăшу кÿрес, бизнес аталанăвне тата хушма ĕç вырăнĕсем йĕркелеме чăрмантаракан факторсене пĕтерес тĕллевпе туса хунине палăртнă.

Владимир Иванов Михаил Игнатьева хăйне шаннăшăн тав тунă, Раççей Президенчĕ çумĕнчи Предпринимательсен прависене хÿтĕлекен уполномоченнăй Борис Титов та ăнăçлă ĕçлемешкĕн ырă суннине каланă. «Бизнеспа ĕçлемешкĕн тупăшлă, меллĕ те хăрушсăр пулмалла - çĕр-шыв аталанăвĕн çул-йĕрĕ çак самантпа та çыхăнмалла», - тенĕ Владимир Иванов.

Чăваш Республикинчи Предпринимательсен прависене хÿтĕлекен института Чăваш Ен Пуçлăхĕн 2013 çулхи нарăс уйăхĕн 13-мĕшĕнчи «Чăваш Республикинче предприниматель ĕç-хĕлне ертсе пымашкăн лайăх условисем туса хумалли мерăсем çинчен» 15-мĕш Указĕпе килĕшÿллĕн йĕркеленĕ.

* * *

Владимир Николаевич Иванов 1974 çулхи çĕртме уйăхĕн 22-мĕшĕнче Чăваш Республикинчи Шупашкар хулинче çуралнă. 1996 çулта И.Н.Ульянов ячĕллĕ Чăваш патшалăх университетне «истори» специальноçпа пĕтернĕ. 2008 çулта И.Н.Ульянов ячĕллĕ Чăваш патшалăх университетĕнчех тепĕр аслă пĕлÿ илнĕ. Специальноç - юриспруденци.

Мускав политика тĕпчевĕсен шкулне пĕтернĕ /2006 çул/. 1995 çулта Шупашкар хулинче «Антей-сервис» компани йĕркелесе /ăна вăл хальхи вăхăтра та ертсе пырать/ тата «Кодак-экспресс» фотоцентр уçса предпринимательте ĕçлеме пуçланă. 2001-2004 ç.ç. - «Кодак» ОООн /Мускав хули/ Чăваш Республикинчи координаторĕ. 2004-2005 ç.ç. - «ММС-Атăлçи» /Мегафон/ АУОн Чăваш Республикинчи коммерци уйрăмĕн ертÿçи. 2005-2011 ç.ç. - «Антей-сервис» ООО директорĕ. 2011 çултан пуçласа хальхи вăхăтра - «РТР-Шупашкар» ООО генеральнăй директорĕ. 2005-2010 ç.ç. - Шупашкар хула депутачĕсен 4-мĕш суйлаври Пухăвĕн депутачĕ. 2010 çулхи юпа уйăхĕн 10-мĕшĕнчен пуçласа хальхи вăхăтра - Шупашкар хула депутачĕсен 5-мĕш суйлаври Пухăвĕн депутачĕ. Вырăнти хăй тытăмлăх тата депутат этикин ыйтăвĕсемпе ĕçлекен комисси председателĕ. 2012 çулхи нарăс уйăхĕнчен - Чăваш Республикин Пуçлăхĕн канашçи. 2011 çулта «Чăваш Республикин культурăн тава тивĕçлĕ ĕçченĕ» хисеплĕ ята тивĕçнĕ. Авланнă, икĕ ача çитĕнтерет. ("Хыпар" хаçатран)