Чăваш Ен Пуçлăхĕ Михаил Игнатьев Раççей Хĕрлĕ Хĕресĕн председателĕпе Раиса Лукутцовăпа, республикăра пурăнакансене ыр кăмăллăх пулăшăвĕ кирлине хаклама Шупашкара килнĕскерпе, ĕçлĕ тĕл пулу ирттернĕ. Раиса Лукутцова палăртнă тăрăх - Чăваш Ен Сывлăх сыхлавĕпе социаллă политика министерстви Раççей Хĕрлĕ Хĕресĕн пĕлтерĕшне ăнланать, çак общество организацийĕн регионти представительствипе тачă çыхăну тытать. Унăн шухăшĕпе, республикăра чрезвычайлă лару-тăру тĕслĕхĕ сахал, çакнашкал лăпкăлăх малашне те упранса юлĕ. Тĕл пулура Хĕрлĕ Хĕресĕн республикăри уйрăмĕ инфекци чирĕсен, туберкулез, ВИЧ-инфекци профилактикин программисене ĕçе кĕртес, миграци политики енĕпе министерствăсемпе тата ведомствăсемпе алла-аллăн ĕçлес ыйтăва сӳтсе явнă. «Должноçри пĕрремĕш çын Хĕрлĕ Хĕрес пĕлтерĕшне лайăх ăнланакан регионта йывăр лару-тăрăва лекнĕ çынсене тĕрлĕ енĕпе пулăшассипе çыхăннă ĕç те ăнăçлă», - тенĕ хăна. Вăл çак организаци ĕçченĕсем Крымскра пурăнакан, шар курнă çынсем валли 1 млрд тенкĕ пухнине пĕлтернĕ, çакăншăн вĕсене Раççей Президенчĕ Владимир Путин та тав тунă. «Хĕрлĕ Хĕрес ĕç-хĕлĕ питĕ кирлĕ. Республика Правительстви те чрезвычайлă лару-тăрура шар курнисене тивĕçлĕ пулăшу кÿме тăрăшать», - тенĕ Михаил Игнатьев асăннă тытăмпа малашне те алла-аллăн ĕçлессе шаннине палăртнă май.