Çамрăксем - пирĕн пуласлăх
Çĕртме уйăхĕн 4-мĕшĕнче Чăваш Ен Пуçлăхĕ Михаил Игнатьев Çамрăксен регионсен хушшинчи «МолГород-2013» V вĕренÿ форумне çитсе курнă. Вăл Атăл леш енчи «Буревестник» кану базинче иртет, унта республикăри район-хуларан 1,5 пин çамрăк пухăннă, çавăн пекех Азербайджанран, Молдовăран, Беларуçрен хăнасем килнĕ.
Яш-кĕрĕмпе хĕр-упраçа саламланă май Михаил Игнатьев Чăваш Енре çамрăксене пулăшасси патшалăх политикин тĕп çул-йĕрĕнчен пĕри пулнине палăртнă. «Влаç тĕллевĕ - сире пурнăçра хăвăрăн вырăна тупма, професси, пултарулăх енĕпе ÿсмешкĕн пулăшасси», - тенĕ вăл. Çамрăксене патшалăх енчен пулăшнин ăнăçлă тĕслĕхĕсене асăннă. Çав шутра - республика Пуçлăхĕн стипендийĕсем, Çамрăксен патшалăх премийĕсем, çамрăксен кадрсен резерв¬не тата Çамрăксен парламентне йĕркелени... Юлашки çулсенче патшалăхăн граждансен службинче тăрăшакансен хушшинче те çамрăк йышлă: виççĕмĕш пайĕ - 30 çул тултарманнисем. «Эпир сире шанатпăр. Шăпах эсир пулас профессионалсем, республикăн ăнăçлă аталанăвĕ малашне сиртен килĕ», - палăртнă Михаил Игнатьев.
Форум программипе килĕшÿллĕн çамрăксен наука-техника пултарулăхĕн «НТТМ-2013» фестивалĕ уçăлнă. Унти проектсемпе, çавăн пекех Раççей ял çамрăкĕсен союзĕн вырăнти уйрăмĕн выставкипе паллашнă хыççăн Михаил Васильевич çамрăксене хăйсен таланчĕпе тата пултарулăхĕпе май пур таран туллин усă курма чĕнсе каланă: «Çак проектсене бизнеспа çыхăнтармалла, вĕсем идея шайĕнче кăна ан юлччăр».
Республика Пуçлăхĕ «Патшалăхăн муниципалитет управленийĕ» лапам ĕçне хутшăннă, унта килнисен ыйтăвĕсене хуравланă. «Чăваш халăхĕн пуянлăхĕ - унăн историйĕ, йăли-йĕрки, ырăлăхĕ, тараватлăхĕ. Глобализаци условийĕсенче пирĕн çак тата ытти пахалăхсене, калăпăр, çемье çирĕплĕхĕн йăлисене упраса хăвармалла», - тенĕ вăл. Хăйне хăш пахалăхсем çитĕнÿ тума пулăшни пирки ыйтнине хуравласа Михаил Васильевич ĕçе юратни, яваплăх, тÿрĕ кăмăллăх пирки каланă.
«МолГород-2013» форум - çулленхи лагерь. Çамрăксем пиллĕкмĕш çул ĕнтĕ кунта пухăнса палаткăсенче пурăнаççĕ, аталану программисемпе проекчĕсен никĕсне хываççĕ. Кăçалхи форум çĕртме уйăхĕн 9-мĕшĕччен ĕçлет. Ăна ЧР Министрсен Кабинечĕ, Россотрудничество, РФ Патшалăх Думин депутачĕ Алена Аршинова тата Шупашкар хулин администрацийĕ пулăшнипе республикăри çамрăксен «Çамрăксен социаллă технологийĕсем» общество организацийĕ йĕркеленĕ.
Н.ВАСИЛЬЕВ.