Утă уйăхĕн 9-мĕшĕнче Чăваш Республикин Пуçлăхĕ Михаил Игнатьев Тĕп Азипе Раççейĕн «Сименс АГ» вице-президенчĕпе,  «Сименс» компанин Президенчĕпе  Дитрих Мёллерпа тĕл пулнă. Сумлă хăна Чăваш Ене ĕçлĕ визитпа килсе çитнĕ. Тĕл пулăва Чăваш Республикин вĕренӳ министрĕ Владимир Иванов, Чăваш Республикин экономика мнистрĕн ĕçĕсене вăхăтлăха пурнăçласа пыракан Владимир Аврелькин, «Сименс» компанин «Интеллектуаллё сетьсем» департамент директорĕ Дмитрий Подгорбунский тата «Шупашкарти электроаппаратсен завоч.» акционерсен хупă пĕрлешĕвĕн директорсен Канашĕн председателĕ Михаил Шурдов хутшăннă. Калаçăва хутшăнакансем медицина, электротехника тытăмĕнчи ыйтусене сӳтсе явнă. Чăваш Ен Пуçлăхĕ Михаил Игнатьев «Сименс» компанипе çыхăну тытни республикăри электротехника кластерлĕ предприятисемшĕн пысăк интерес çуратнине палăртнă. Ытларах электротехника промышленноçĕнче, кадрсене хатĕрлес ĕçре пысăк пулăшу кӳнине асăннă. Килнĕ хăнана республика Пуçлăхĕ Чёваш Ен Правительстви шкултан вĕренсе тухакансене инженерипе техника специальноçне алла илме пысăк пулăшу кӳнине палăртнă. Чи пĕлтерĕшлĕ инвестици – çыншăн инвестици хывни, республика экономикишĕн пархатарлă пулнине асăнса хăварнă. Дитрих Мёллер хăйĕн сăмахĕнче Чăваш Республики лайăх аталанса пыракан регионсем шутĕнче тăнине каланă. «Сименс» компанишĕн республика инвестици хывма тата таварĕсене вырнаçтарма май паракан стратеги пĕлтерĕшлĕ объект шутланнине палăртнă. Çамрăксене инженер профессине алла илме явăçтаракан политикăна ырланă. «Паян экономика секторне çамрăксене явăçтарни паха. Нумай чухне вĕсем ытти профессие алла илме васкаççĕ". Килнĕ хăна республикăри сывлăх сыхлавĕн тытăмне те пысăк тимлĕх уйăрнă. Çитес вăхăтра вĕсем медицина хатĕрĕсене юсама центр хута ярасси çинчен те калаçу хускатнă. «Сименс» компанин Президенчĕ центрта медицина персоналне вĕсем  туса кăларакан хатĕрсемпе ĕçлеме вĕрентекен вырăн та уçасшăн. «Сименс» представителĕсен ĕçлĕ визичĕ пирки Михаил Игнатьев çĕртме уйăхĕн 21-мĕшĕнче Санкт-Петербургра иртнĕ экономика форумĕнче калаçса килĕшнĕ пулнă.Тĕплĕнрех