Редакторсен тата авторсен пĕрлехи ĕçне пула «Чăваш чĕлхи» (3-мĕш класс, авторĕсем – В.И.Игнатьева тата ыттисем), «Тăван литература» ( 5-мĕш класс, Н.Г.Иванова тата ыттисем), «Чăваш чĕлхи» (2-мĕш класс, Г.В.Абрамова), «Тăван тавралăх» (8-мĕш класс, Е.В.Енькка), «Чăваш чĕлхи» (3-мĕш класс, Л.П.Сергеев тата Т.В.Артемьева) тата чăвашла ытти кĕнекесем «пиçсе» тухрĕç.

Класс тулашĕнче вуламалли «Ылтăн шевле» (2-мĕш класс валли, О.Г.Кульев, А.Р.Кульева) «Литература вулавĕ» учебникăн тăсăмĕ пулса тăрать. Пособин тĕп тĕллевĕ – урокра илнĕ пĕлĕве çирĕплетесси.

Учительсене пулăшма «Чăваш чĕлхипе литератури олимпиадине ирттересси» (Е.А.Андреева, В.И.Игнатьева, П.Н.Метин) пособи кун çути курнă. Унта тестсем, ыйтусем, олимпиада валли текстсем кĕртнĕ. Рецензенчĕсем – Ю.М.Виноградов, О.В.Скворцова, Е.В.Иванова.

Чăваш кĕнеке издательствин редакторĕсем учебниксене куçарассипе те нумай тимлеççĕ. Кăçал пичете пĕтĕмĕшле пĕлÿ паракан шкулсем валли икĕ пайран тăракан «Математика» (М.Моро тата ыттисем) хатĕрлесе çитернĕ. Вăл 1–4-мĕш классем валли, «Школы России» системăна кĕрет.

3-мĕш тата 4-мĕш классем валли «Пирĕн тавралăх» (А.А.Плешаков) учебника патшалăхăн вĕрентÿ стандарчĕсен йĕркипе пуянлатса хатĕрленĕ. Унта кашни урокăн тĕллевĕсемпе задачисене, проект ĕçĕ-хĕлне, харпăр хăйне тĕрĕслемелли страницăсем кĕртнĕ. Чăвашла «Просвещение» издательство кăларăмĕнчен куçарнă.

Чылай учебникăн ĕç тетрачĕсем пур. Кĕçех çавăн пекех «Индивидуальный маршрут ученика» серирен тĕрлĕ предметпа «çул кăтартакан» кĕнекесем пичетленсе тухмалла.