Чăваш Республикин Пуçлăхĕ Михаил Игнатьев Чӑваш Республикинчи автомобиль тата хулари пассажир транспорчӗн ӗҫченӗсен кунӗ ячӗпе саламлани
Чӑваш Республикинчи автомобиль тата хулари пассажир транспорчӗн хисеплӗ ӗҫченӗсем!
Сире професси уявӗ ячӗпе саламлатӑп!
Хальхи вӑхӑтри этем пурнӑҫӗ груз турттаракан тата ҫынсене халӑх пурӑнакан тӗрлӗ вырӑна илсе ҫитерекен автомобиль тата хулари пассажир транспорчӗсӗр мӗнлерех пуласси пирки шухӑшлама та йывӑр.
Чӑваш Енре транспорт ҫыхӑнӑвне ҫирӗппӗн тата кӑлтӑксӑр ӗҫлеттерессине йӗркелес енӗпе тухӑҫлӑ мерӑсем йышӑнатпӑр. Лайӑх аталаннӑ транспорт инфратытӑмне туса хунӑ, вӑл автомобиль транспорчӗпе хулари, хула ҫумӗнчи тата хуласем хушшинчи маршрутсем тӑрӑх грузсемпе пассажирсене хӑтлӑн тата хӑрушсӑр турттарассине тивӗҫтерет.
2013 ҫулта пурте усӑ куракан автомобиль транспорчӗн пулӑшӑвӗпе Чӑваш Енре 105,6 миллион пассажир усӑ курнӑ, тата 77,1 миллион ҫын вара – хулари электричество вӑйӗпе ҫӳрекен транспорт пулӑшӑвӗпе. Автотранспорт предприятийӗсем пулӑшнипе 2,6 миллион тоннӑна яхӑн груз турттарнӑ. Общество транспорчӗ лайӑх та кӑлтӑксӑр ӗҫлени граждансен социаллӑ хӑй туйӑмлӑхӗ ҫине ырӑ витӗм кӳрет тата халӑх власть органӗсене шанассине ӳстерет.
2012 ҫултанпа республикӑра ҫул ҫӳренӗшӗн укҫасӑр татӑлма май паракан автоматланӑ тытӑм ӗҫлет. 2014 ҫултан пуҫласа ҫул ҫӳремелли электронлӑ билетпа вӗренекенсемпе студентсем те усӑ курма тытӑнчӗҫ.
Юлашки ҫулсенче «Усӑ курма лайӑх хутлӑх» программа шайӗнче сывлӑх тӗлӗшӗнчен хавшак ҫынсем валли ятарлӑ троллейбуссемпе автобуссем туянатпӑр, вӗсене инвалид кӳмипе ҫӳрекен сусӑр ҫынсене турттарма юрӑхлӑ туса хатӗрленӗ.
Автомобиль тата хулари пассажир транспорчӗн ӗҫченӗсемпе ветеранӗсене пӗтӗм кӑмӑлтан ҫирӗп сывлӑх, ӗҫре ҫитӗнӳсем, хавхалану, лайӑх кӑмӑл-туйӑм, такӑр ҫул, телей тата ырлӑх сунатӑп!
Чӑваш Ен Пуҫлӑхӗ М.Игнатьев