Малта пулма майсем çителĕклĕ
ЧР Пуçлăхĕ Михаил Игнатьев ертсе пынипе февралĕн 4-мĕшĕнче Чăваш патшалăх драма театрĕнче Шупашкар районĕн 2013 çулти социаллă экономика аталанăвĕн лару-тăрăвне пĕтĕмлетрĕç. Çавăн пекех 2014 çулта пурнăçламалли тĕп çул-йĕре палăртрĕç. Канашлăва ЧР Министрсен Кабинечĕн Председателĕ Иван Моторин, ЧР экономика, промышленноç тата суту-илÿ аталанăвĕн министрĕ Владимир Аврелькин, ЧР ача прависен енĕпе уполномоченнăйĕ Вячеслав Рафинов хутшăнчĕç. Вĕсем тĕрлĕ ыйту сÿтсе яврĕç: нумай ачаллă çемьесене çĕр уйăрса парас проектсене пурнăçа кĕртесси, муниципаллă пурлăха регистрацилесси, граждансене авариллĕ çурт-йĕртен куçарасси, агропромышленноç комплексĕн аталанăвĕ тата ытти те.
Çĕнĕ ушкăнсем уçăлнă
Театр фойинче районта малта пыракан предприятисен продукцийĕсен дегустаци-куравне йĕркеленĕччĕ. Михаил Васильевич кунти çимĕçпе паллашрĕ, организаци представителĕсемпе сăмах хушрĕ.
Канашлура Чăваш Ен Пуçлăхĕ районти чи лайăх ĕçлекенсене чысласа саламларĕ. Унсăр пуçне районăн социаллă экономика аталанăвне пĕлтерĕшлĕ витĕм кÿнĕшĕн тата обществăлла пурнăçра хастар пулнăшăн ял тăрăхĕсенчи старостăсене (Çĕньял, Сарапакасси, Ишлей, Чăрăшкасси, Лапсар тата Çĕньял-Покровски) палăртрĕç.
Канашлăва хутшăнакансен умĕнче тĕп докладпа Шупашкар райадминистраци пуçлăхĕ Георгий Егоров тухса калаçрĕ. Вăл 2013 çулхи пĕтĕмлетÿпе паллаштарчĕ, малашнехи аталану çул-йĕрĕ çинче чарăнса тăчĕ. «Районти пĕрлештернĕ бюджет миллиарда çитнĕ пулăм – пĕрремĕш хут. 2013 çулта тупăш туса илнĕ виçе – 1210 млн тенкĕ (99,6%), тăкак виçи – 1199 млн тенкĕ (96,1%)», – терĕ Георгий Иванович.
Ял хуçалăх таварне туса кăларакансене тĕш тырă туса илнĕ чухнехи тăкака саплаштарма пĕлтĕр районта пуçласа 5 млн тенкĕ субсиди уйăрнă. 2013 çулта ял хуçалăхне патшалăх пулăшу кÿнĕ пĕтĕмĕшле виçе 380 млн тенкĕпе (2012 çулхипе танлаштарсан 31% ÿснĕ) танлашнă.
Георгий Егоров палăртнă тăрăх, «Çамрăк çемьесен çурт-йĕр условийĕсене лайăхлатасси» ЧР Президенчĕн Указне пурнăçа кĕртсе Шупашкар районĕнче пĕлтĕр 16 çамрăк çемьен çурт-йĕр условине лайăхлатнă, авариллĕ пурăнмалли вырăнтан 35 çынна куçарма 14 хваттер туяннă, ашшĕ-амăш хÿттисĕр юлнисем валли 5 çурт хăпартнă. Райадминистраци пуçлăхĕ 2014 çулта спорта аталантарма район бюджетĕнчен 5 млн тенкĕ уйăрнине (2 хута яхăн ÿстернĕ) те асăнчĕ.
Районта ача сачĕсенчи черете чакарас ыйтăва татса параççĕ. «Шкула кайманнисен йышĕ вăтамран – 30%. Черетре 1689 ача (1,5-3 çултисем –1109, 3-5 çултисем – 102). Çак çитменлĕхе ачасем валли çĕнĕ ушкăнсем уçса пĕтерме палăртнăччĕ. Çапла майпа 2013 çулта 370 вырăн хушăннă. Шкула кайманнисем валли 15 ушкăн (райбюджетран уйăрнă укçапа – 6) уçнă. 2014 çулта икĕ ушкăн уçма палăртнă – Тренккасси ялĕнче (50 вырăнлă) тата Мăнал салинче (25 вырăнлă). Çавăн пекех Кÿкеçре тума пуçланă ача садне хута ямалла. Паянхи куна хăй тивĕçĕсене пурнăçламан ТСК «Парнаспа» контракта пăрахăçланă...» – ăнлантарчĕ Георгий Иванович.
Райадминистраци пуçлăхĕ 2013 çулта февраль уйăхĕнчен пуçласа «Патшалăх тата муниципаллă пулăшупа тивĕçтерекен нумай функциллĕ центр» патшалăх (31) тата муниципаллă (37 тĕрлĕ) пулăшусемпе тивĕçтерме пуçланине аса илтерчĕ. Килес çул Паçпак ялĕнче ФАП хăпартма тĕллев лартнине пĕлтерчĕ.
Ача сачĕсем хыççăн – черет клубсене
Канашлăва залри хăнасем те хутшăнчĕç. Малтанах Çÿлтикассинчи храм настоятелĕ Шупашкар район администраци пуçлăхне ырă ĕçĕсемшĕн тав турĕ: çÿп-çапа вăхăтра тасатнăшăн, юр хÿсе лартнă çулсене вăхăтра уçнăшăн.
Атайкасси ял тăрăхĕнчен ыйту паракан пулчĕ: «Садик та, клуб та çукки канăç памасть. Çĕр çул каяллахисемех. Çĕнĕ клуба хăçан та пулсан курайăпăр-ши?» Георгий Егоров Атайкасси ял тăрăх пуçлăхне 4 ушкăнлăх ача сачĕ валли, Кÿкеç ял тăрăх пуçлăхне вара – кăçал уçма палăртнă 240 вырăнлă шкул умĕнхи учрежденисĕр пуçне – тата тепĕр проектсем хатĕрлеме хушу пани пирки каларĕ.
Апаш ял тăрăхĕнчи депутат та пăшăрханăвне пытармарĕ: «Паçпак ялĕнче 10 çул каялла клуб пулнă, халĕ – çук. ФАПсене хута янă йышши программăпа е ытти майпа клуба тавăрма май килмест-ши?» Георгий Иванович çулталăк хушшинче пур çурт-йĕре те тума çуккине ăнлантарчĕ: «Район бюджетĕнче клуба хута яма хальлĕхе укçа çук, çавăнпа федераци тата республика пулăшмасăр май пулмĕ. Çакна та каламалла: Культура çулталăкĕнче строительтво енĕпе çеç ĕçлемелле мар, хамăр таврари культурăна тимлемелле: киревсĕр сăмахсемпе усă курассине пĕтермелле…» Калани çумне Михаил Игнатьев çакна хушрĕ: «Малтанах ача сачĕсене туса пĕтермелле, кайран тин клубсем патне куçмалла. Клуб учрежденийĕ мĕнле ĕçлеме пултарнине те шута илмелле... Халĕ нумайăшĕ çурма пушă лараççĕ. Ăшăтса тăма, ĕçлекенсене тÿлеме укçа сахал мар кирлĕ».
Шупашкар районĕнчи шкул директорĕ пултаруллă çамрăксемпе учительсене кăçал премипе хавхалантарасси çинчен пĕлесшĕн пулчĕ. Георгий Иванович ку ыйтăва пăхса тухма шантарчĕ, преми вара тĕрлĕ шайра пулĕ: Раççей, республика тата район.
«Атайкасси, Лапсар тăрăхĕсенчи тавра çула тăвас ĕç епле пырать-ши?» – кăсăкланчĕç тĕл пулура. Георгий Егоров ыйтăва çапла хуравларĕ: «Пурте пĕлетпĕр: ку – федераллă трасса. Апла пулсан лару-тăру районтан çеç килмест, хальлĕхе татăклă йышăну туман». Михаил Игнатьев палăртса çапла каларĕ: «Пĕлтерĕшлĕ пулăмсене никам та район çыннисемпе канашламасăр татса памасть. Тĕрлĕ специалистсен, экспертсен шухăшĕсене те шута илĕç паллах. Кунне чупса иртекен 35-40 пин машина валли пирĕн çул уçса памалла-çке».
Анат Макаçри староста ачасене шкул автобусĕпе турттарма пуçлас ыйтăва хускатрĕ. Георгий Егоров хуравĕ çапла пулчĕ: «Çул-йĕре ремонт тума тата пăхса тăма 2013 çулта 35 миллиона яхăн укçа уйăрнă, 2014 çулта тĕллевленĕ хак – 49 млн тенкĕ. Юртукассипе Анат Макаçри шкул автобусĕ çаврăнса тухмалли площадка тума палăртнă. Сăмах панине пурнăçа кĕртетпĕрех».
«Пирĕн ял çумĕнче çÿп-çап купаланса выртать… Тепĕр пăтăрмах та хумхантарать. Вĕренекенсем 3 километрти шкула çуранах çÿреççĕ. Шкул автобусĕпе турттарма май çук-и?» – ыйту пачĕ Илпешри староста. Георгий Егоров хытă каяшсен полигонне хута ярсан çÿп-çап вырăнне рекультивацилес ĕç пуçланмаллине аса илтерчĕ. Шкул автобусне çÿреттерме çуккине вара çул-йĕр кăлтăкĕсемпе çыхăнтарчĕ. Апла пулин те Вятка енне каякан çулăн эскиз проектне хатĕрленине пĕлтерчĕ.
Тутаркасси ял тăрăхĕнчи шкулта ĕçлекентен çапла ыйту пулчĕ: «Эпĕ 1968 çултанпах çакăнта пурăнатăп. Кашни хĕлле пĕр çитменлĕх пăшăрхантарать: хваттерсенче сивĕ, ăшă 14-15 градусран хăпармасть. Котельнăй кивелнĕ. Клубсăр пурăнма пулать-ха, анчах сивĕ ытла аптăратать. Хăçан татса параççĕ çак ыйтăва?» «Коммуналлă çурт-йĕр хуçалăх çитменлĕхĕсене пĕтерме 2013 çулта 13 млн тенкĕ уйăрнă пулсан, çак тытăма модернизацилеме 2014 çулта 35 млн тенкĕ уйăрма палăртнă. Унсăр пуçне блоклă-модульлĕ котельнăйсем Тутаркассинчи шкулта тата «Золушка» ача садĕнче хута кайĕç», – терĕ Георгий Егоров.
Ишлейри модульлĕ котельнăя ĕçлеттерме пуçласси çинчен те сăмах пуçарчĕç. Кивелнĕ, юхăннă… Лару-тăру «Уют» управляющи компани тивĕçĕсене кирлĕ пек пурнăçламаннипе çыхăннине палăртрĕç. Залра ларакансенчен панă тепĕр ыйту Тутаркассинче котельнăй кивелни (1983 çулхиех) пăшăрхантарнипе çыхăннăччĕ. Михаил Васильевич çирĕплетсех каларĕ: «Паянхи кун çынсен хваттерсенче шăнмалла мар. Ку çитменлĕхе татса памаллах, унсăрăн влаçа шанми пулĕç».
Иван Моторин докладĕнчи тĕп шухăш та çакна уçăмлатрĕ: «Паянхи кун ăшăпа тивĕçтерекен хуçалăха модернизацилессипе ĕç пырать. Район аталану енĕпе лидер пулмалла, мĕншĕн тесен çакна валли майсем пур…»
Чылай ыйтăва татса парасси район çыннисем хăйсем çине тăнинчен те нумай килет.
«2014 çулта, Культура çулталăкĕнче, пирĕн тăван халăхăмăрăн чун тасалăхĕ, чыспа тÿрĕ кăмăллăх пирки аса илмелле, çак кивелми ăс-хакăллăха упраса хăварассишĕн тăрăшмалла. Çамрăксен патриотла воспитанийĕ çинчен те шухăшламалла. Çакă пĕтĕмпех Шупашкар районĕн, пĕтĕм республикăн ăнăçлă аталанăвĕн никĕсĕнче пулмалла», – терĕ Михаил Игнатьев тĕл пулăва пĕтĕмлетнĕ май.