Пуш уйăхĕн 12-мĕшĕнче Чăваш Республикин Пуçлăхĕ Михаил Игнатьев Министрсен Кабинечĕн кулленхи ларăвне хутшăннă. Чăваш Ен Правительствин членĕсем Чăваш Республикин республика бюджетĕнчен парса тивĕçтермелли субсидисен саккун йĕркине кĕртнĕ çĕнĕллĕхсене ырланă. Транспорт министерствин ертӳçи хальхи вăхăтра Михаил Янковский муниципалитетсене парса тивĕçтерекен субсидисен виçи пурăнакан çынсем хисепне шута илсе куçарнине асăннă. Малашне саккуна кĕртнĕ ылмашусене шута илсе, муниципалитетсем хушшинче вырнаçнă çул-йĕрсене тивĕçтермелли пулăшăва çулсен çухрăмне те шута илсе куçарма палăртни çинчен асăннă. Ларура Чăваш Республикин территорийĕнче вырнаçнă нумай хваттерлĕ çуртсенче тĕпрен юсав ĕçĕсене йĕркелесе ирттерессин саккунне кĕртнĕ улшăнăвĕн проектне те ырласа хăварнă. Республикăн Чăваш Ен территорийĕнче вырнаçнă нумай хваттерлĕ çуртсенчи пĕрлехи пурлăха тĕпрен юсамаллипе çыхăннă программи /2014-2043 çулсем валли/ тата ăна пурнăçа кĕртмелли плансене çирĕплетесси çинчен каласа кăтартрĕ. Ку программăна республикăри нумай хваттерлĕ çуртсене пурне те тенĕ пекех кĕртнĕ* авариллĕ тата ишĕлес патнех çитнĕ тесе йышăннă, 70% таран юхăннă, çавăн пекех 3-рен сахалрах хваттерлĕ çуртсемсĕр пуçне. Унтах юсава хăçан ирттермеллине, ку тĕлĕшпе мĕнле ĕç пурнăçламаллине палăртнă. Юсав черетне йĕркеленĕ чухне нумай хваттерлĕ çурта хăçан хута янине, пĕрлехи пурлăхăн техника тăрăмне шута илеççĕ. Пирĕн республикăра пĕтĕмпе нумай хваттерлĕ 10198 çурт, вĕсенчен 4733-шĕнче тĕплĕ юсав ирттермелле, кăçал - 513-шĕнче. Олег Марков каланă тăрăх - ку программăна çулсеренех çĕнетсе тăмалла. «Нумай хваттерлĕ çуртсене вун-вун çул юсаман, çавна май ку ыйтăва чылай çын хускатать. Калас пулсан, вырăнти депутатсем те лайăхах ыйтăва уçăмлатманни сисĕнет», - тесе палăртнă республика Пуçлăхĕ. Чăваш Ен территорийĕнче вырнаçнă нумай хваттерлĕ çуртсене тĕпрен юсав ĕçĕсем йĕркелесе ирттерес программăна пур çуртсене те кĕртсе хăварнă. Çакнашкал çуртсем пурĕ Чăваш Ен территорийĕнче 10 пин те 198 çурт шутланса тăрать, вĕсенчен 4733-шĕнче тĕпрен юсав ĕçĕсем йĕркелемелле. 2014 çулта программăпа килĕшӳллĕн 513 нумай хваттелĕ çурта юсав ĕçĕсем тума палăртнă, ĕçсене йĕркелесе ирттерме 164 млн. тенкĕ кирлĕ пулĕ. «Çуртсене вуншар çул ытла юсав ĕçĕсем ирттермен. Тен çавăнпа та пулĕ, халăх пăшăрханать. Ыйтăва çивĕч пăхса тухса, кирлĕ пек пурнăçламаллине, кашни уйрăм йышăну çинчен халăха вăхăтрах пĕлтерсе тăмалла», - тесе асăрхаттарса хăварнă Михаил Игнатьев. Паянхи ларура Чăваш Енре тӳлевсĕр юридици пăлăшăвĕпе тивĕçтермелли саккуна кĕртнĕ улшăнусене те тишкернĕ. Пухăннисем улшăнусемпе килĕшнĕ. Чăваш Республикин вĕренӳ тата çамрăксен политикин министрĕ Владимир Иванов 2010-2013 çулсенчи ĕç кăтартăвĕсемпе паллаштарнă. Министр хăйĕн доклатĕнче асăннă çулсенче вĕренӳ тытăмĕнчи çĕнĕлĕхсемпе ӳсĕмсем, çитменлĕхсем çинчен  те чарăнса тăнă. Владимир Иванов министр професси пĕлĕвĕ паракан вĕрентӳ учрежденийĕсенче оптимизаци йĕркелес ĕçсене пурнăçласа, Çĕрпӳри  аграри технологийĕн техникумĕ çумне Кугеçри 27-№лĕ училищăна пĕрлештересси пирки пăхса тухнине асăннă. Пуш уйăхĕн 11-мĕшĕнче Мускавра Шупашкар хулине никĕсленĕренпе - 550, Чăваш автономи облаçне туса хунăранпа 100 çул çитнине уявлама хатĕрленес енĕпе ĕçлекен йĕркелӳ комитечĕн черетлĕ ларăвне хутшăнни пирки Чăваш Ен Пуçлăхĕ тĕплĕн чарăнса тăнă. Чăваш Енре кăçалхи çĕртме уйăхĕн 18-мĕшĕнче, федерацин Атăлçи округĕнчи мĕн пур регион, çавăн пекех халăх пултарулăхĕн «Раççей çăл куçĕсем» фестивальĕ, йăлана кĕнĕскер Культура çулне халалласа иртĕ. Ăна май, федераци бюджетĕнчен кирлĕ пек хушма пулăшу куçĕ. Культура училищисем валли кĕвĕ хатĕрсем туянма 15 млн., культура çурчĕсене тĕпрен юсав ĕçĕсем йĕркелеме 22 млн, автоклубсене валли 10 млн. тенкĕ пăхса хăварнă.  Чăваш Енри культурăн ятарлă палăкĕсене илемлĕх кĕртесси ыйту та çиеле тухса тăрать. Вĕсене упраса хăварасси те тĕп ыйтусем шутне кĕрет.