Пуш уйăхĕн 15-мĕшĕнче Чăваш Республикин Пуçлăхĕ Михаил Игнатьев район тата хула администрацийĕсен пуçлăхĕсемпе видеоканашлу ирттернĕ. 2014 çулта кăрлачпа нарăс уйăхĕсенчи пурăнмалли çурт-йĕр строительствин малтанласа палăртнă кăтартусемпе Чăваш Республикин строительство министрĕ Олег Марков тĕплĕн паллаштарнă. Министр палăртнă тăрăх, çулталăк пуçланнăранпа, икĕ уйăх хушшинче, 24 пин кв.м. çурт-йĕре хута янă. Пĕтĕмпе 2014 çул хушшинче 850 пин кв. метра яхăн çурт-йĕр пурнăçа кĕртме палăртса хунă. Çамрăк çемьесене хваттерсемпе тивĕçтерес федераллă программăна пурнăçлама республика бюджетĕнче пурĕ 210 млн тенкĕ пăхса хăварнă, вырăнти бюджетсенче 63 млн тенкĕ, федераци бюджетĕнчен 126 млн. тенкĕ уйăрнă. Асăннă укçа-тенкĕпе 600 яхăн çамрăк çемьене хăтлă хваттерсемпе тивĕçтерме май килĕ. Кăçалхи çул тата 100 млн. яхăн 95 ветерана пулăшу кӳме патшалăхран укçа куçĕ. Ветерансемпе, сусăрланнă çынсене, инвалид ачасене усрава илнисене хваттерсемпе  пулăшма 51 млн. тенкĕ куçарма палăртнă. Нумай ачаллă 34 çемьене çурт-йĕрпе пулăшма 85,8 млн. тенкĕ пăхса хăварнă. 2014 çулта тăлăха юлнă 253 ача хваттерсем илсе хăйсен кăмăлне тултарĕç. Всене валли 244 млн. тенкĕллĕх тăкакланма палăртнă. Михаил Игнатьев муниципалитет ертӳçисене бюджет укçи-тенкипе эффективлă усă курма чĕнсе хăварнă. Ĕçлеме пĕлмен подрядчиксенчен хăпма кирлине асăннă. Чăваш Республикин вĕренӳ министрĕ Владимир Иванов 9-11-мĕш классенче ирттермелли патшалăхăн пĕрлĕхлĕ экзаменĕсем пирки тĕплĕн чарăнса тăнă. Асăннă ыйтупа кĕртнĕ çĕнĕллĕхсемпе паллаштарнă. Кун йĕркипе килĕшӳллĕн сусăрланнă ачасене шкул программине вĕрентес ыйту çине те тимлĕх уйăрнă, вĕрентӳ кĕнекисем валли шкулсенче ашшĕ-амăшĕсенчен укçа пуçтарма юраманнине те палăртса каланă. Пухăннисем районсемпе хуласенче çут-çанталăк газĕшĕн пуçтарăнса кайнă парăмсем пирки те çивĕч калаçнă. Пуш уйăхĕн 13-мĕшĕ тĕлне çакнашкал парăм – 638, 5 млн. тенкĕне çитнĕ. Парăмсен пайĕ ытларах Улатăр, Элĕк, Хĕрлĕ Чутай, Çĕмĕрле районĕсенче тата Шупашкарпа Улатăр хулинче. Чăваш Ен Пуçлăхĕ Михаил Игнатьев парăмсене «Газпром межрегионгаз Чебоксары» тулли мар яваплă пĕрлешĕве çийĕнчех парса татмалли пирки асăрхаттарса хăварнă. Тĕплĕнрех