Чăваш Республикин Пуçлăхĕ Михаил Игнатьев Пӗтӗм тӗнчери хӗрарӑмсен кунӗ ячӗпе саламлани
Хаклӑ хӗрарӑмсем!
Сире ҫуркуннехи питех те илемлӗ уявпа – Пӗтӗм тӗнчери хӗрарӑмсен кунӗ ячӗпе – пӗтӗм чунтан саламлатӑп!
Эсир ҫут тӗнчене пурнӑҫ пиллетӗр, шанчӑкпа юрату парнелетӗр. Сирӗн аллӑрсен ӑшшисӗр, илӗртӳллӗ ҫиҫекен куҫӑрсен асамлӑхӗсӗр тата ырӑ чӗрӗрсӗр пирӗн пурнӑҫ пулма та пултараймасть.
Хӗрарӑмсем паян хӑйсен ӗҫри пысӑк ӑсталӑхне тата яваплӑхне шанчӑклӑн ҫирӗплетсе тӗрлӗ сферӑра пысӑк ҫитӗнӳсем тӑваҫҫӗ.
Кашни хӗрарӑмах патшалӑх пулӑшӑвне туйса тӑма, малашлӑхалла ырӑ куҫпа пӑхма тивӗҫ, ҫавӑнпа ӗнтӗ ача амӑшӗпе ачалӑха пулӑшасси, ҫемье институтне ҫирӗплетесси Чӑваш Республикин Правительствин тӗп тӗллевӗсем пулса тӑраҫҫӗ.
Нумай ачаллӑ ҫемьесем тӗрлӗ майпа укҫа-тенкӗ пулӑшӑвӗ илсе тӑраҫҫӗ, вӗсене ҫурт-йӗр тума, хушма хуҫалӑх тытма ҫӗр лаптӑкӗсене тӳлевсӗр уйӑрса параҫҫӗ. Чӑваш Ен Раҫҫейри шкулчченхи вӗренӳ организацийӗсенчи черете пысӑк хӑвӑртлӑхпа чакарса пыракан регионсен шутне кӗрет. Кӑҫал кӑна республикӑра 14 ача сачӗ тума палӑртнӑ.
Патшалӑхӑн ҫавнашкал лайӑх политики хӑйӗн пархатарне кӳрет. 2012 тата 2013 ҫулсенче республикӑра халӑх хӑй халлӗн ӳснине шута илнӗ тата Чӑваш Енре пулса иртекен улшӑнусен чи лайӑх хакӗ ҫакӑ!
Уяв ячӗпе сире, хаклӑскерсем тата юратнӑскерсем! Ҫывӑх ҫыннӑрсен чун-чӗри ӑшшипе пулӑшӑвӗ сире пурнӑҫ пӑтӑрмахӗсенчен шанчӑклӑн хӳтӗлесе тӑччӑр, ҫирӗплӗхпе ырлӑх вара ҫирӗп ҫемьесем чӑмӑртама, кӗтекен пепкесем ҫуратма пулӑшса пыччӑр!
Сире ҫирӗп сывлӑх, чун ӑшшипе ҫураҫулӑх, яланах лайӑх кӑмӑл-туйӑм, телей тата савӑнӑҫ сунатӑп!
Чӑваш Республикин Пуҫлӑхӗ М.В. Игнатьев
