Чăваш Республикин Пуçлăхĕ Михаил Игнатьев Космонавтика кунӗ ячӗпе саламлани
Хисеплӗ космонавт летчиксем, ӑсчахсем, конструкторсем, уҫлӑха парӑнтарас ӗҫӗн ветеранӗсем, ракетӑпа космос ҫарӗсен ӗҫченӗсем тата ҫар ҫыннийӗсем!
Сире Космонавтика кунӗ ячӗпе саламлатӑп!
1961 ҫулхи ака уйӑхӗн 12-мӗшӗнче Юрий Алексеевич Гагарин тӗнче уҫлӑхне пуҫласа ҫул хывнӑ. Ҫав чаплӑ вӗҫев хыҫҫӑн ҫулталӑк иртсен космос анлӑхне Чӑваш Енӗн мухтавлӑ ывӑлӗ – Андриян Николаев парӑнтарнӑ.
Уҫлӑха пӗрремӗш пулса ҫӗкленнӗ паттӑрсен ырӑ тӗслӗхӗ ун чухне пин-пин ҫамрӑк чунӗнче космоспа ҫыхӑннӑ ҫутӑ ӗмӗт ҫуратнӑ. Хӑйсен пархатарлӑ ӗмӗтне пурнӑҫланисем хушшинче Раҫҫей Геройӗсем – Николай Бударинпа Муса Манаров космонавтсем, вӗсем те, Андриян Николаев пекех, тивлетлӗ Чӑваш ҫӗрӗ çинче ӳснӗ.
Паян ҫын пурнӑҫӗнче ҫӳллӗ шайри космос технологийӗсем паллӑ вырӑн йышӑнса тӑраҫҫӗ, вӗсемсӗр вӑл мӗнлерех пулассине куҫ умне ӳкерме те йывӑр. Чӑваш Енри ӑнӑҫлӑ аталанакан, ӑслӑлӑхпа конструктор ӗҫӗнче тата промышленноҫра пысӑк вӑй-хӑватпа палӑрса тӑракан предприятисем тӗнчери сумлӑ авиакосмос салонӗсене тӑтӑшах хутшӑнни чӑннипех савӑнтарать.
Космонавтика аталанӑвӗн тата уҫлӑха парӑнтарас ӗҫӗн историйӗ, тӳпе романтики хӗрӳ чӗреллӗ ҫамрӑксене ӗлӗкхиллех илӗртет. Паян пирӗн республикӑри ҫамрӑк космонавтсен юхӑмӗ 2000 ытла арҫын ачапа хӗр ачана пӗрлештерсе тӑрать. Чӑваш Енри кашни районпа хуларах пулас космонавтсем тӗпчевпе ӑслӑлӑх тата проект ӗҫӗсене пурнӑҫлаҫҫӗ, вӗҫекен аппаратсен макечӗсене туса хатӗрлеҫҫӗ, космос тематикипе иртекен Раҫҫейри тата регионсем хушшинчи конкурссене хастар хутшӑнаҫҫӗ.
Хӑйсен паха опычӗпе тарӑн пӗлӗвне ҫамрӑк ӑрӑва паракан аэрокосмос отраслӗн ветеранӗсене чунтан тав тӑватӑп. Чӑваш Енре пурӑнакансем хӑйсен ырми-канми ӗҫӗпе тата ҫӗнӗ открытийӗсемпе Раҫҫейӗн космос отраслӗнчи хӑватлӑхне тата та вӑйлатма пулӑшасса шанса тӑратӑп!
Сире ҫирӗп сывлӑх, мӗн пур ырӑ пуҫарура ӑнӑҫу, телей тата ырлӑх сунатӑп!
Чӑваш Республикин Пуҫлӑхӗ М. Игнатьев.