Шупашкарти 2-мĕш номерлĕ вĕренÿ учрежденийĕнче шкул çулĕчченхи ачасен тата кĕçĕн классенче вĕренекенсен «Эпĕ - тĕпчевçĕ» ятпа тĕпчевпе пултарулăх ĕçĕсен Пĕтĕм Раççейри конкурсĕн регионти тапхăрĕ иртнĕ. Кунта Элĕкри И.Я.Яковлев ячĕллĕ пĕтĕмĕшле вăтам пĕлÿ паракан шкулта вĕренекенсем пысăк ăсталăх кăтартнă.

4 «б» класри Наталья Иванова, Милош Николаев тата Константин Лебедев «Калаçаççĕ музей залĕсем» тĕпчев ĕçне тăратнă та «Гуманитари» енĕпе çĕнтерÿçĕсем пулса тăнă.

3 «а» класри Никита Иванов «Çутăпа тĕс» пултарулăх ĕçĕпе «Физика тата техника» енĕпе виççĕмĕш вырăн йышăннă.

Çĕнтерÿçĕсемпе призерсем Чăваш Республикин Вĕренÿпе çамрăксен политикин министерствин дипломĕсемпе медалĕсене тата парнесене тивĕçнĕ.