Шкултан вĕренсе тухакансен ку эрнере патшалăх пĕрлехи экзаменĕсен хĕрÿ тапхăрĕ пуçланчĕ. Географипе тата литературăпа патшалăх пĕрлехи экзаменне суйласа илнисем тунти кун хăйсене тĕрĕслерĕç ĕнтĕ. Ыран вара, майăн 29-мĕшĕнче, шкултан вĕренсе тухакан кашни çамрăк (вĕсем пирĕн районта 201 тата малтанхи çулсенче шкултан вĕренсе тухнисем тепĕр 3 çын) вырăс чĕлхипе экзамен тытĕ.

Малаллахи кунсенче вара экзамен çак йĕркепе иртет: июнĕн 2-мĕшĕнче - ют чĕлхепе тата физикăпа* июнĕн 5-мĕшĕнче - математикăпа* июнĕн 9-мĕшĕнче - информатика тата ИКТ предмечĕпе, биологипе тата историпе, июнĕн 11-мĕшĕнче - обществознанипе.

Район администрацийĕн вĕренÿ, çамрăксен политики тата физкультурăпа спорт пайĕнчен пĕлтернĕ тăрăх математикăпа - 202, физикăпа - 76, химипе - 17, информатикăпа - 3, биологипе - 39, географипе - 9, акăлчан чĕлхипе - 9, обществознанипе - 129, литературăпа - 4, чăваш чĕлхипе тата литературипе - 1 çын экзамен тытать.

Июнĕн 16-мĕшĕнче резерв кунĕсем пуçланаççĕ.

Тăххăрмĕш класран вĕренсе тухакансем (361 ача) паян, майăн 28-мĕшĕнче, хăйсен пĕрремĕш пĕтĕмлетĕвĕсене турĕç - обществознани, хими, литература, информатика тата ИКТ предмечĕсемпе патшалăх итог аттестацийĕ пулчĕ. Шăмат кун, майăн 31-мĕшĕнче, вĕсене пурне те математикăпа аттестаци кĕтет, июнĕн 3-мĕшĕнче - географипе, историпе, биологипе, ют чĕлхесемпе тата физикăпа, июнĕн 6-мĕшĕнче - вырăс чĕлхипе.

Июнĕн 14-мĕшĕнче вара тăххăрмĕш классенче вĕренекен 11 ача чăваш чĕлхипе тата литературипе регионти пĕрлĕхлĕ экзамена тытма Кÿкеçри 1 номерлĕ вăтам шкула кайĕ.  Çав кунах çавăнтах 11 класран вĕренсе тухакансен те чăваш чĕлхипе тата литературипе экзамен иртет.

Тăххăрмĕшсен резерв кунĕсем июнĕн 10-мĕшĕнчен пуçланаççĕ.