Чăваш Республикин Пуçлăхĕ Михаил Игнатьев Ачасене хӳтӗлемелли пӗтӗм тӗнчери кун ячӗпе саламлани
Хаклӑ ентешӗмӗрсем!
Сире Ачасене хӳтӗлемелли пӗтӗм тӗнчери кун ячӗпе саламлатӑп.
Ачалӑх – пурнӑҫри чи илемлӗ те ҫутӑ, савӑнӑҫпа тата телейпе тулли, ҫӗнӗлӗхсемпе пуян тапхӑр.
Патшалӑх, общество тата ҫемье тӗллевӗ – кашни ача хӑйне юратнине, уншӑн тӑрӑшнине туллин туйса тӑтӑр, мӗн пур ачах сывӑ та телейлӗ ӳссе ҫитӗнтӗр, лайӑх пӗлӳ илтӗр, ӑс-хакӑлпа кӑмӑл-сипет хаклӑхӗсене ӑша хывса ӳстӗр тесе мӗн кирлине пурне те тӑвасси.
Республикӑра шкулчченхи тата шкул вӗренӗвӗн тытӑмӗсене ҫӗнетес ӗҫ хастарлӑн пурнӑҫланать. Юлашки виҫӗ ҫулта 23 ача сачӗ тунӑ тата юсаса ҫӗнетнӗ, ҫапла майпа пӗтӗмпе 13,9 пине яхӑн вырӑн йӗркеленӗ, ҫав шутра ҫӗнӗрен туса тата юсаса ҫӗнетсе – 4,2 пин ытла вырӑн. Асӑннӑ тӗллевсем валли 2 миллиард тенкӗ ытла янӑ.
2014 ҫулта ача сачӗсем тума 1 миллиард ытла укҫа-тенкӗ уйӑрнӑ, ҫавна май 3,7 пин вырӑн йӗркеленет.
Иртнӗ тӑватӑ ҫулта пӗтӗмӗшле пӗлӳ паракан 8 ҫӗнӗ шкул хута кайнӑ, республикӑри шкулсен 70 проценчӗ юсав ӗҫӗсем туса ирттернӗ. Вӗренӳ заведенийӗсене хальхи йышши вӗренӳ, вӗренӳпе лаборатори хатӗр-хӗтӗрӗпе пуянлатнӑ, апатлану вырӑнӗсемпе столовӑйсене ҫӗнетнӗ.
Чӑваш Енре обществӑра ҫемье, ача хаклӑхсене йӗркелеме, ашшӗ-амӑшӗн яваплӑхне ӳстерме, усрав ҫемье институтне ырласа йышӑнма пулӑшакан мерӑсем вӑя кӗреҫҫӗ.
Республикӑри ашшӗ-амӑшӗн асӑрхавӗсӗр тӑрса юлнӑ ачасен тӳпи чакса пынин кӑтартӑвӗ, ҫӗр-шывӗпе илсен те, чи лайӑххисенчен пӗри. Ача усрама илекенсене хавхалантарас тӗллевпе ача усрава илнӗ граждансене 300 пин тенкӗ, сусӑр ачана усрава илнисене пӗр ачашӑн 375 пин тенкӗ виҫепе пӗр хутчен паракан пособи тӳлеҫҫӗ.
Ҫамрӑк тата нумай ачаллӑ ҫемьесене пулӑшас, ачасен сывлӑхне ҫирӗплетес тата канӑвне йӗркелес тӗллевлӗ программӑсем ӑнӑҫлӑ пурнӑҫланаҫҫӗ.
Хӑйсен ӗҫне кура тата чун-чӗри хушнипе ачасен ырлӑхӗшӗн пӗтӗм вӑй-халне парса тӑрӑшакан мӗн пур ҫынна тав сӑмахӗ калатӑп. Эпӗ тӑван пепкисене кӑна мар, усрава илнӗ ачасене те тивӗҫлипе пӑхса ҫитӗнтерекен ҫемьесене, нумай ачаллӑ ҫемьесене те чунтан тав тӑватӑп.
Хисеплӗ аслисем! Ачасене чунтан юратӑр, вӗсемшӗн тимлӗн тӑрӑшӑр. Чӑваш Енӗн ҫамрӑк гражданӗсен ачалӑхӗ савӑнӑҫлӑ та телейлӗ пултӑр. Кашни килтех йӑл кулӑ ҫиҫтӗр тата ача-пӑча кулли янӑратӑр. Пурне те тӑнӑҫлӑх, ырлӑх тата телей!
Чӑваш Республикин
Пуҫлӑхӗ М.Игнатьев
