Чăваш Республикин Пуçлăхĕ Михаил Игнатьев Ҫыхӑнупа электронлӑ массӑллӑ информаци отраслӗсен ӗҫченӗсен кунӗ ячӗпе саламлани
Ҫыхӑнупа электронлӑ массӑллӑ информаци отраслӗсен хисеплӗ ӗҫченӗсем тата ветеранӗсем!
Сире професси уявӗ ячӗпе саламлатӑп!
Ку чухнехи ҫыхӑну хатӗрӗсем хальхи тӗнчере питех те пысӑк вырӑн йышӑнса тӑраҫҫӗ. Радио, телевидени, интернет, мобильлӗ ҫыхӑну ҫултан-ҫул лайӑхланса пыраҫҫӗ, вӗсем пирӗн пурнӑҫа хӑтлӑрах, ҫаврӑнӑҫуллӑрах тӑваҫҫӗ, информаци тӗлӗшӗнчен пуянлатаҫҫӗ.
Чӑваш Республикинче «Чӑваш Ен информаци обществи» патшалӑх программи ӑнӑҫлӑ пурнӑҫланать, унӑн шайӗнче хальхи вӑхӑтри информаци тата телекоммуникаци инфратытӑмӗ вӑй илсе йӗркеленет.
Чӑваш Ен Наци телерадиокомпанийӗн «Тăван радио» радиостанцийӗ ӗҫлеме пуҫлани пӗлтӗрхи паллӑ ҫитӗнӳсенчен пӗри пулса тӑчӗ, паян вӑл республикӑн пӗтӗм территоринех радиохыпарлавпа тивӗҫтерсе тӑрать.
Иртнӗ 10 ҫул хушшинче пуҫласа Чӑваш Республикин Власть органӗсен порталӗн технологи платформи ҫӗнелсе улшӑнчӗ, халӗ ӑна вырӑсла кӑна мар, республикӑра пурӑнакансен кӑмӑлне шута илсе чӑвашла та тытса пыраҫҫӗ. Ҫӗнӗ информаци порталӗсем – Геопортал тата Чӑваш Республикин Уҫӑ даннӑйсен порталӗ хӑйсене лайӑх енчен кӑтартса пачӗҫ. Патшалӑх пулӑшӑвӗн пӗрлехи порталӗпе усӑ куракансен шучӗ те палӑрмаллах ӳсрӗ.
Радиопа телевидени тата ҫыхӑну хатӗрӗсен ӗҫченӗсем республикӑра пурӑнакансене малашне те информаципе васкавлӑн тата тӗрӗс те туллин тивӗҫтерсе тӑрассишӗн пӗтӗм вӑйне хурса ӗҫлесси пирки иккӗленместӗп.
Сире ҫирӗп сывлӑх, ҫурхи лайӑх кӑмӑл, профессире ҫӗнӗ ҫитӗнӳсем, телей тата ырлӑх сунатӑп!
Чӑваш Республикин Пуҫлӑхӗ М.Игнатьев
