Хаклă ентешĕмсем, хисеплĕ спортсменсем, тренерсем, спорт юхăмĕн ветеранĕсем, физкультурăпа спорта юратакансем, сывă пурнăç йĕркине тытса пыма ăнтăлакансем!

Сире Физкультурник кунĕ ячĕпе чун-чĕререн саламлатăп!

Физкультурăпа спорт кашни çын пурнăçĕнче пысăк пĕлтерĕшлĕ, вĕрентÿпе воспитани тытăмĕн пĕр пайĕ пулса тăраççĕ. Физкультурăпа туслашнă май сывлăх, кăмăл, тÿсĕмлĕх, хамăр вăя шанасси çирĕпленеççĕ.

Пирĕн республикăра массăллă физкультурăпа спорт занятийĕсем валли пĕтĕм услови пур. Юлашки 5 çулта халăха спорт сооруженийĕсемпе тивĕçтересси 36-ран 46% таран пысăкланнă. Чăваш Енĕн кашни районĕпе хулинче çĕнĕ йышши физкультурăпа сывлăх комплексĕсем, стадионсем, спорт площадкисем тунă. Пысăк çĕнĕ спорт объекчĕсем çĕкленеççĕ. Çав шутра – Шупашкарти 7 пин çынна йышăнмалли Пăр кермен "нумай функциллĕ универсаллă центр", регионти Олимп хатĕрленĕвĕн велоспорт-маунтинбайк тата биатлон центрĕсем, лаша спорчĕн комплексĕн тăрă айĕнчи манежĕ.

Кăçалтан республикăра уйăхсерен Сывлăхпа спорт кунне ирттеретпĕр – кăмăл пуррисем республикăри спорт сооруженийĕсене тÿлевсĕрех килме пултараççĕ. Патшалăхăн тĕллевлĕ политики лайăх кăтартусем тума май пачĕ. Паянхи кун тĕлне Чăваш Енре пурăнакансен 36% яхăн йышĕ физкультурăпа тата спортпа туслă, 2013 çул кăтартăвĕсем тăрăх пирĕн республикăна пуçласа Раççейĕн чи лайăх спорт регионĕ тесе Раççей Федерацийĕн Правительствин наци премине пачĕç.

Республикăра пĕтĕм Раççейри тата пĕтĕм тĕнчери пысăк ăмăртусем ытларах та ытларах иртеççĕ. Кăçалхи çĕртме уйăхĕнче Шупашкар Пенсионерсен I спартакиадине йышăнчĕ, унта Раççейĕн 56 регионĕнчен тата 4 ют çĕр-шывран аслă ăрăвăн спортпа туслă представителĕсем килчĕç. Çитес çул республикăн тĕп хулинче çăмăл атлетсен командисен Европа чемпионатне ирттермелле, 2016 тата 2018 çулсенче вара – хăвăрт утакансен Тĕнче кубокне.

Спорт юхăмĕн ветеранĕсене, хăйсен çĕкленÿлĕхĕпе, малашлăха шаннипе, кăмăл хăвачĕпе çамрăксене спортпа туслă пулма, сывă пурнăç йĕркине тытса пыма хавхалантараканскерсене, уйрăмах тав тăватăп.

Чăваш Енре пурăнакансене пурне те çирĕп сывлăх, телей, хăйсен вăйне шанма, çĕнтерÿ патне ăнтăлма тата спортра çĕнĕ çитĕнÿсем сунатăп!

Чăваш Республикин Пуçлăхĕ                                                             М.ИГНАТЬЕВ.