Каçал ен районĕ: чăваш халăхĕн мухтавлă ывăлне А.Г. Николаев космонавта халалласа
Чăваш халăхĕн мухтавлă ывăлĕ А.Г. Николаев космонавт çуралнăранпа 85 çул çитрĕ. Çак ятпа Республикăра тĕрлĕ мероприяти ирттерме палăртнă. Вĕсенчен чи пĕлтерĕшли – «Уйри агросăн» проект. Унăн авторĕ – Çĕнĕ Шупашкарта пурăнакан пуçаруллă çын, профессиллĕ спортсмен тата предприниматель Юрий Иванов. Проект тăрăх «Уйри агросăн» ÿкерчĕк тĕнче уçлахĕнчен курăнмалла. Агросăн 3 гектар йышăнĕ. Кун пекки Раççейре те çук. Ăна чăваш халăхĕн ырă йăли-йĕркипе – ниме йĕркипе - тума йышăннă.
Комсомольскинчи 2-мĕш вăтам шкулта та мухтавлă космонавта халалласа 5, 6, 7 классенче вăйă-урок иртрĕ. Ачасем ентешĕн пурнăç çулĕпе паллашрĕç, кĕнекесемпе журналсенчи интереслĕ статьясене тишкерчĕç, ун çинчен çырнă сăвăсене итлерĕç. 8 б класри А.Черновăпа Е.Лукиянова хатĕрленĕ хыпарсене те итлеме кăмăллă пулчĕ. 6 класс ачисем хăйсем Космонавтика музейĕнче пулса курни çинчен каласа пани те пуриншĕн те кăсăклă пулчĕ. Вĕренекенсем А.Г.Николаев космонавт ятне яланах асра тытма пулчĕç, вĕсем унпа чăннипех мухтанма тивĕçлине палăртрĕç.