Чăваш Ен Пуçлăхĕ Михаил Игнатьев «РЕНОВА» Компанисен ушкăнĕн правленийĕн председателĕпе Алексей Московпа тĕл пулнă
Авăн уйăхĕн 19-мĕшĕнче «Сочи-2014» Пĕтĕм тĕнчери инвестици форумĕнче Чăваш Ен Пуçлăхĕ Михаил Игнатьев «РЕНОВА» Компанисен ушкăнĕн правленийĕн председателĕпе Алексей Московпа тĕл пулнă. Калаçăва Чăваш Республикин экономика министрĕ Владимир Аврелькин, «РЕНОВА» Компанисен ушкăнĕн правленийĕн председателĕн çумĕ Ринат Халиков, «Чăваш Республикин корпораци аталанăвĕ» акционерсен уçă пĕрлешĕвĕн директорĕ Евгений Федоров хутшăннă. Пухăннисем Шупашкарти аэропорт объектне реконструкци тăвассине «Регионсенчи аэропортсем» АХП программине кĕртсе хăварасси пирки канашланă. Унсăр пуçне калаçу вăхăтĕнче «Хĕвел» тулли мар яваплă пĕрлешĕвĕн, «Химпром» акционерсен уçă пĕрлешĕвĕн малашнехи тапхăрти ĕçĕсемпе çыхăннă ыйтусене те сӳтсе явнă. Инвестици проекчĕсене пурнăçа кĕртесси пирки сăмах хускатнă. 2014 çулхи утă уйăхĕнче «Ренова» Компани ушкăнĕ тата «РОСНАНО» АУП, «Хĕвел» тулли мар яваплă пĕрлешӳ производство йĕркеленĕ. Унта 260 çын вăй хурать. Компани калăплакан таварсене Раççейри 14 региона ăсатма килĕшӳ хучĕсене те йĕркелесе çитернĕ. «РЕНОВА» Компанисен ушкăнĕн правленийĕн председателĕ Алексей Москов хăйĕн сăмахĕнче «Хĕвел» тулли мар яваплă пĕрлешӳре промышленноçпа технологи производствине хута янине те асăннă. Хальхи вăхăтра тĕрлĕ хатĕрсемпе туллин тивĕçтерес ĕç пынине пĕлтернĕ. Инвестицисем хывакан проект пирки калас пулсан, ăна пурнăçа кĕртме 2,5 млрд. тенкĕ уйăрма палăртса хунă. «Технологи проекчĕ питĕ йывăр. Ăна пурнăçлама паянхи куна Швеци специалисчĕсемпе пĕрле тĕрлĕ хатĕре вырнаçтарса лартма проектпа смета докуменчĕсене хатĕрлесе çитернĕ. Эпĕ проект 2015 çулта пурнăçа кĕрессе çирĕппĕн шанатăп», - тесе каланă Алексей Москов. Михаил Игнатьев хăйĕн сăмахĕнче «Химпром» АУП çумĕнчи «Хĕвел» завочĕсем хушма производствăсем вăй илсе кайсан çынсем валли кирлĕ пек ĕç вырăнĕсем йĕркелеме, тĕрлĕ йышши социаллă программăсене пурнăçлама, пухăнакан налук пайне ӳстерме майсем пулассине палăртнă. Тĕплĕнрех