Чăваш Республикин Пуçлăхĕ Михаил Игнатьев Раҫҫей пичечӗн тата Чӑваш пичечӗн кунӗсемпе саламлани
Хисеплӗ журналистсем, издательсем тата полиграфистсем!
Сире професси уявӗпе – Раҫҫей пичечӗн тата Чӑваш пичечӗн кунӗсемпе саламлатӑп!
Массӑллӑ информаци хатӗрӗсем пирӗн обществӑн уйрӑлми пайӗ пулса тӑраҫҫӗ, унӑн интересӗсене хӳтӗлеҫҫӗ, власть органӗсемпе граждансем хушшинчи тухӑҫлӑ ҫыхӑнӑва тивӗҫтереҫҫӗ. Регионти социаллӑ ҫирӗплӗх ытларах чухне ҫыру анинче тӑрӑшакансем хӑйсен ӗҫне мӗн таран уҫҫӑн, яваплӑха туйса, таса тата тӳрӗ кӑмӑлпа пурнӑҫланинчен килет. Ӗҫ-хӗл йӗркине палӑртнӑ май, вӗсем вӗт общество шухӑш-кӑмӑлӗ, ҫынсен ӑс-тӑнӗпе кӑмӑл туйӑмӗ ҫине витӗм кӳреҫҫӗ, политика тата идеологи анлӑхне йӗркелеҫҫӗ.
Чӑваш Енӗн ку чухнехи пресси тӗнчери информаци хутлӑхӗпе тачӑ ҫыхӑннӑ. Хаҫатсемпе журналсем Интернет сетӗнче хӑйсен кӑларӑмӗсен электрон версийӗсене аталантараҫҫӗ, ҫакӑ вӗсене аудиторие анлӑлатма, вулакансемпе лайӑхрах ҫыхӑнса ӗҫлеме пулӑшать. Республикӑри кӑларӑмсем граждансен интересӗсем ҫине тимлӗх уйӑрса, чи пӗлтерӗшлӗ пулӑмсем ҫинчен объективлӑн пӗлтерсе тӑрса, ҫӗнӗ технологисене наци пичечӗн чи лайӑх йӑли-йӗркипе тачӑ ҫыхӑнтараҫҫӗ. Журналистсен пысӑк ӑсталӑхне тата ҫӳллӗ шайри яваплӑхне пула републикӑри МИХсем хӑйсен чи хаклӑ туприне – вулакансен шанӑҫне – сыхласа хӑварма пултарчӗҫ.
Сире ҫирӗп сывлӑх, пултарулӑхра малашнехи ҫитӗнӳсем, интереслӗ темӑсемпе геройсем, ырӑ хыпарсем, ҫырӑнса илекенсен йышне ӳстерме тата ку чухнехи информаци технологийӗсене аталантарма сунатӑп. Ӑнӑҫупа хастарлӑх яланах сирӗн шанчӑклӑ ҫулташӑрсем пулччӑр!