Чăваш Республикин Пуçлăхĕ Михаил Игнатьев Раҫҫей студенчӗсен кунӗ ячĕпе саламлани
Хаклӑ туссем!
Сире Раҫҫей студенчӗсен кунӗ ячӗпе чун-чӗререн саламлатӑп!
Студентсем – обществӑри чи хастар та мал ӗмӗтлӗ ҫынсем. Эсир ҫамрӑк та хӗрӳллӗ, мӑнаҫлӑ та пуҫаруллӑ, пуҫӑрта ҫӗнӗ тӗллевсемпе тӗлӗнтермӗш идейӑсем ҫуралсах тӑраҫҫӗ. Палӑртса хунӑ ҫутӑ ӗмӗтӗрсем пурнӑҫланасси вара веҫех хӑвӑртан килет. Патшалӑх сире пултарулӑхӑрпа туллин усӑ курма кирлӗ майсем туса парать. Анчах та пурнӑҫра ҫитӗнӳ тӑвас тесен ӗҫчен, тимлӗ тата тӑрӑшуллӑ пулмалла.
Чӑваш Республикинче ӗҫ паракансемпе вӗренӳ организацийӗсем пӗр-пӗринпе тухӑҫлӑ ҫыхӑнса ӗҫлеҫҫӗ. Электротехника тата машиностроени факультечӗсенчен вӗренсе тухакансем пурте предприятисене ӗҫе вырнаҫаҫҫӗ тата тивӗҫлӗ ӗҫ укҫи илеҫҫӗ. Ҫамрӑк ҫынсем экономикӑн ытти сферинче те питех те кирлӗ, мӗншӗн тесен республикӑра тӑтӑшах ҫӗнӗ производствӑсем уҫӑлаҫҫӗ тата ҫӗнӗ ӗҫ вырӑнӗсем йӗркеленеҫҫӗ.
Спортпа туслашма физкультурӑпа спорт комплексӗсем, бассейнсем, стадионсем ҫӗклесе лартнӑ, искусствӑлла сийпе витнӗ футбол уйӗсем тунӑ. Уйӑхра пӗрре – Сывлӑх кунӗнче – вӗсемпе тӳлевсӗр усӑ курма май пур.
Чӑваш Республикин патшалӑх политикин тӗп тӗллевӗсен шутне пултаруллӑ ҫамрӑксене тупса палӑртассипе пулӑшу парасси те кӗрет. Наукӑпа техника тата наукӑпа тӗпчев ӗҫӗнчи пултарулӑха популяризацилес тата унӑн тухӑҫлӑхне ӳстерес тӗллевпе кашни ҫулах 200 ытла ӑслӑлӑх мероприятийӗ иртет, унта студентсем хӑйсен ӑс-хакӑлне тата пултарулӑхне туптаҫҫӗ.
Чăваш Республикинче çамрăксен патшалăх премийĕсене парассине йăлана кĕртнĕ, ăна 108 çын тивĕçнĕ. Пултарулӑхри ӑнтӑлушӑн кашни ҫулах пӗр пин каччӑпа хӗре стипенди тӳлесе хавхалантаратпӑр, кашни уйăра тӳлекен стипендие 12 пин çамрăк илет. Ҫамрӑксен пысӑк пӗлтерӗшлӗ тата чи кирлӗ пуҫарӑвӗсене укҫа-тенкӗ уйӑрса пулӑшатпӑр.
Пирӗн яш-кӗрӗм паянхи пур пек майсемпе пӗлсе усӑ курасса тата хамӑрӑн юратнӑ республикӑна пуянрах тата капӑртарах тӑвасса шанса тӑратӑп.
Мĕнпур студента ырлăх-сывлăх, телей, ăнăçу тата юрату сунатăп!
Чӑваш Ен Пуҫлӑхӗ М. Игнатьев
