Чăваш Республикин Пуçлăхĕ Михаил Игнатьев Пӗтӗм тӗнчери ватӑ ҫынсен кунӗ ячӗпе саламлани
Хисеплӗ ветерансем!
Сире Пӗтӗм тӗнчери ватӑ ҫынсен кунӗпе саламлатӑп!
Пурсӑра та республика ырлӑхӗшӗн нумай ҫул тата тӳрӗ кӑмӑлпа ӗҫленӗшӗн, Чӑваш Ен аталанӑвӗпе чечекленӗвне сиртен кашниех хывнӑ курӑмлӑ тӳпешӗн пӗтӗм чунтан тав тӑвас тетӗп!
Хальхи вӑхӑта туптанӑ ҫынсене, хамӑрӑн асатте-асаннесене тата кукаҫи-кукамайсене, эпир яланах асра тытатпӑр тата вӗсемшӗн тӑрӑшатпӑр. Тӑван ҫӗршывӑн Аслӑ вӑрҫин ветеранӗсен пурӑнмалли условийӗсене лайӑхлатмалли программӑна пурнӑҫласси кӑҫал вӗҫленет. «Чӑваш Республикин ӗҫ ветеранӗ» ята ӗҫ стажне кура парасси ҫинчен ҫирӗплетнӗ йышӑнӑва пула 41 пин ҫын ҫак хисеплӗ ята тата унпа килӗшӳллӗн палӑртнӑ ҫӑмӑллӑхсене тивӗҫрӗ. Республикӑри ватлӑх енне сулӑннӑ 250 пин ытла ҫын тӗрлӗ майпа социаллӑ пулӑшу илсе тӑрать.
Медицина пулӑшӑвӗ паракан тытӑм тухӑҫлӑ ӗҫлени Чӑваш Енри халӑх пурнӑҫӗн вӑтам тӑршшӗне юлашки виҫӗ ҫул хушшинче 2,5 ҫула ҫити пысӑклатма пулӑшрӗ. Нумай пурӑнакансен йышӗ 18 процент чухлӗ ӳсрӗ. Хальхи вӑхӑтра Чӑваш Енре 100 ҫул урлӑ каҫнӑ 58 ҫын пурӑнать, 80-85 ҫултан иртнисен шучӗ вара – пилӗк пин ытла.
Пирӗн патшалӑх политики ветерансем валли лайӑх хутлӑх йӗркелессине тата ватӑсене сума сӑвассине тӗпе хурать. Чӑваш Енре аслӑ ӑру валли тӗрлӗ ӗҫ пурнӑҫланать. Ҫакӑ тивӗҫлӗ канури ҫынсене общество пурнӑҫне хутшӑнма ырӑ майсем йӗркелет. Практика кӑтартса панӑ тӑрӑх, пурнӑҫра хастар пулни унӑн пахалӑхне чылай ҫуллӑха ҫӳллӗ шайра сыхласа хӑварма пулӑшать!
Хисеплӗ туссем, эсир чунӑрпа ҫамрӑк, ӑс-тӑн тата кӑмӑл-сипет хаклӑхӗсем тӗлӗшӗнчен те ҫирӗп. Сирӗн ӑрӑвӑр хӑйӗн кун-ҫулӗнче чылай йывӑрлӑх тата хӗн-хур тӳссе ирттернӗ, анчах та ҫав синкерсем сире хуҫайман, чун хавалне тата та ҫирӗплетнӗ кӑна. Ҫамрӑксем сирӗнтен тӗслӗх илме, сирӗнпе танлашас тесе тӑрӑшма тата малашлӑхалла шанчӑклӑн пӑхма тивӗҫ.
Сире пӗтӗм чунтан ҫирӗп сывлӑх, телей, вӑрӑм кун-ҫул, иксӗлми вӑй-хал тата ырӑ шанӑҫ сунатӑп!
Чӑваш Республикин
Пуҫлӑхӗ М.Игнатьев